Scholarship atana matching share budget-ah dah a ni - HTE Minister

Higher & Technical Education (HTE) minister Dr Vanlalthlana chuan, kum 2025-26 atana post matric scholarship mi 31,830 hnenah pek tawh a nih thu leh, ZPM-in sorkarna an chan hnuah scholarship pekna atana state matching share (SMS) chu state budget-ah dah nghal a nih tawh avangin sanction chauh dil a ngaih tawh thu a sawi.

HTE Minister hian October 30, 2026-a a pisaa thuthar thehdarhtute a kawmnaah scholarship chungchang sawiin, "ZPM-in sorkarna kan chan hnuah scholarship pekna atan SMS a hrana allocation dil ngai ziah ṭhin chu state budget-ah dahin, sanction chauh dil a ngai ta a, scholarship pek pawh kan awlsam phah tawh," a ti.

Post Matric ST Scholarship chu academic year 2025-26 atana dilte hnenah kumin 2026-27 hian sem a nih thu sawiin Minister chuan, "Diltu 32,375 zingah 31,830 pek tawh an ni a, a bak mi 545-te hi an Aadhaar leh bank account lam fel loh avangin la pek theih rih lo an ni," a ti a; pek tawh zat percentage chu 98.32 a nih thu a sawi.

Dr Vanlalthlana chuan, Pre Matric ST Scholarship chu high school zirlai - pawl 9 leh pawl 10 zirlaite'n an dil ṭhin thu sawiin, "Kum 2025-26 atana dilte hnenah kumin 2026-27 hian sem a ni a, diltu mi 8,875 zinga mi 8,045-te pek tawh an ni a, a bak mi 830-te pawh hi an Aadhaar leh bank account lam fel loh avanga la pek loh an ni. Kan achievement percentage chu 90.64 a ni," a ti.

HTE Minister sawi danin, academic session 2026-27 atana Post Matric Scholarship dilna hun khàr a ni tawh a, dilna 37,592 lutin, kum 2025-26 aia kumina dilna lut zat tamna chu 5,217 (14.91%) a ni. Kum 2026-27 atana Pre Matric Scholarship dil theih hun pawh khar a ni tawh a; zirlai 10,825-in an dil a, kum hmasa aiin diltu 1,950 (19.8%)-in an tam zawk.