Vigilance Awareness Week Walkathon

India ramah Vigilance Awareness Week hman mek a ni a, Week pual hian October 31, Inrinni zing khan Vigilance department huaihawtin Aizawlah Walkathon buatsaih a ni a, chief secretary Khilli Ram Meena-a'n Vanapa Hall kawt aṭangin a vailiam.

Walkathon-ah hian Mizoram sorkara officer pay level-13 chin chung lam te, Vigilance department leh Anti Corruption Bureau-a thawk te, St Paul's HSS zirtirtute leh zirlaite ṭhahnem tak an tel a; thuziak an ken bakah, eirûk dona auhla (slogan) hmangin an au rual a ni.

Millennium Centre kawta kawngzawh khârnaah Chief Secretary chuan, eirûkna do chu mi tin mawhphurhna a nih thu sawiin, eirûkna tel lo society siam tura mahni zâwn ṭheuhah ṭan la turin sorkar hnathawkte a fuih. ACB SP Lalbiakkila kaihhruaiin 'Rinawmna thutiam' sawi rual a ni.

Vigilance Week pual vek hian Aizawl College zirlaite'n 'Eirukna tirêm tur hian sorkar hnathawkte an pawimawh ber a ni,' tih thupui hmangin debate an nei bawk.

Vigilance Awareness Week hi October 26 - November 1, 2026 chhungin hman a ni a; India-in zalenna a sual laia nasa taka thâ thawhtu leh zalenna a hmuh hnua Deputy Prime Minister leh Home Minister pawh lo ni tawh Sardar Vallabhbhai Patel pian champha October 31 behchhanin hman ṭhin a ni.