Pafa tuiah an tla hlum

Seithanga (62) leh a fapa Sanghluna (28), Kolasib Tuiṭha Vengte chu October 29, Ningani tlai dar 5 vel khan Saibual luiah an tla hlum.

Vanglaini thu dawn danin, Seithanga leh Sanghluna te hi thing la turin Saibual ramah an kal a, Saibual ram hi Bairabi kawng, Hortoki lama awm a ni. Tlaia an haw tur chu Sanghluna hian Saibual lui chu a khauh leh khauh loh enfiah turin a lut a, chesualin, tuiah a tla a ni.

Seithanga chu a fapa chhan tumin luiah a zuang lut ve nghal a, chesual ve zuiin, tuiah a tla ve leh a ni. Pafa chesual lai hi hmutu awm mah se, tui an thiam loh avangin an chhan thei lo a, khaw mite an hrilh.

Kolasib Tuiṭha Veng khawtlang mipui ṭhahnem tak chu Seithanga leh Sanghluna te zawng turin an thawk chhuak a; zan dar 6:15 khan Seithanga ruang hmuh a ni a, zanlai pelh, nimin zing khawvar hma dar 1:30 velah Sanghluna ruang hmuh ve leh a ni. An pahnih hian nimin tlai khan a rualin vui an ni.

Seithanga hi an lawina Kolasib Tuiṭha Veng Presbyterian Kohhranah kohhran upa a ni a, Sanghluna hi KṬP, Tuiṭha Veng Branch leader ni lai a ni.