MNF kan sorkar leh veleh MSSSB kan din thar nghal ang - Dr Thangtea

MNF senior vice president Dr R Lalthangliana chuan Vangpui Fehchhuah kal zelah nimin khan a bial chhunga Bawngthah, Darlung, South Sabual leh Bawlte khuate a tlawh a; MNF an sorkar leh veleh Mizoram Subordinate Services Selection Board (MSSSB) an din thar leh nghal dawn thu a sawi.

Dr R Lalthangliana chuan, MNF sorkar liam taa MSSSB an din chu ZPM sorkarin a ṭhiah thu sawiin, "MNF sorkar leh veleh Mizo ṭhalaite tan engti zawng pawhin MSSSB din thar leh a ni ang. ZPM sorkar hnuaia hna thawk hlei thei loa MPSC awm mek pawh MNF sorkar leh hunah mumal taka hna thawk theia siam a ni ang," a ti.

MNF Senior Vice President thusawi MNF-in an tarlan danin, kum 2022-2023 chhung khan MSSSB-in budget allocation cheng nuai 132.02 a neih laiin, MPSC-in nuai 1,107.08 a nei a; MSSSB-in sorkar hnathawk mi 5,271 a chinfel laiin, MPSC-in mi 129 chauh a chingfel a ni.

Dr R Lalthangliana hian Aibawk - Darlung inkar kawng a en a, "Kum 20 zet kal ta khan helai kawng hi MNF sial tlang a ni a, tun thlengin thuam ṭhat leh a la ni lo. MNF a sorkar hunah chuan intermediate lane talin kawngpui ṭhaa siam law law kan tum ang," a ti.