Mizoram leh Assam inṭhian ṭhat nan Inter-State Border Festival buatsaih

Kolasib district-a mite leh Assam-a Cachar district mite tan nimin khan Vairengte Joint YMA Field-ah 'Inter-State Border Festival' buatsaih a ni a, Counter Insurgency and Jungle Warfare (CIJW) School, Vairengte commandant Maj.Gen. Kulvir Singh-a'n a hawng.

Inter-State Border Festival hi Mizoram leh Assam mipuite inkarah inkungkaihna leh inṭhian ṭhatna ṭha zawk leh hnam nunphung inhriat chian tawnna a awm theihna tura buatsaih a ni a; hnam lâm, zai leh infiamna chi hrang hrang hmangin state (district) pahniha mipui tan intihlimna buatsaih a ni. Festival hi vawiinah chhunzawma zawh a ni ang.

Festival hawnna inkhawm hi Vairengte SDO (Civil) Dr Samuel Lalmalsawma Sailo-in a kaihruai a; Festival pual hian MzSRLM hnuaia self help group-te leh sorkar department hrang hrangte'n stall 21 an siam a, Mizo kut hnathawktute thar leh kutchhuak thil chi hrang hrang pho chhuah a ni.

Inter-State Border Festival hawngtu Maj.Gen. Kulvir Singh chuan, ramria chengte inkara inunauna ṭha zawk a awm theihna tura kût buatsaih a ni chu ṭha a tih thu sawiin, "Hnam hrang leh tih dan phung hrang hrang neite karah inhriatthiam tawnna leh inzahsak tawnna a thlen ngei ka beisei a, hetiang hun hlimawm tak buatsaihtu Kolasib DC leh Cachar DC te an fakawm tak zet," a ti a; festival chu chhunzawm zel a nih a beisei thu a sawi.