Minister-in transformer 22 a vailiam; Sorkarin transformer thar 276 lei tawh

Power & Electricity minister F Rodingliana chuan October 28, Nilaini khan MRT Stockyard, Zuangtui aṭangin Aizawl district chhunga hman tur transformer 22 a vailiam a; Minister chuan, transformer thar 276 an lei tawh thu a sawi.

F Rodingliana chuan, mipuite'n kawlphetha hnianghnar zawka an hmuh theih nan theihtawp an chhuah thu a sawi a, "Kan sorkar tirhah transformer chhe mai thei awmte endikin, 375 thlak ngai a awm tih kan hmu chhuak. Vawiina 22 kan thawn chhuah nen hian transformer thar 276 kan lei tawh a, a dang pawh lei turin kan ruahman mek a, thlak ngai zawng zawng thlak theih kan beisei," a ti.

Transformer thar an lei bakah, hmun hrang hranga electric hrui chhiate pawh a thara thlak a nih thu sawiin Minister chuan, "Hei hian kawlphetha kal ral nasa lutuk ṭhin a tihziaawm beisei a ni. Kawlphetha hnianghnar nei turin theihtawp kan chhuah," a ti a; hydel project an siam bakah, sorkar term kal mek chhungin solar plant hmangin kawlphetha negawatt 100 siam hman tum a nih thu a sawi.

PE Minister chuan, theihtawpa kawlphetha renchem tura mipui chahin, awm lohna pindante tiêng loa electric off zel turin a chah a, "Mizoram pumah hetiang hi kan tih theih chuan zan khatah ringawt pawh kawlphetha megawatt 5 vel an hum thei dawn a ni," a ti.

Kawlphetha renchem inzirtir kawngah local council, village council leh tlawmngai pawl hrang hrangte a theih ang anga hmalakpui turin Minister hian a sawm a ni.