Mizoram State Museum thar hawn a ni

29th October, 2026

Mizoram State Museum chu Thingpui Huan Tlang (MacDonald Hill) aṭangin MINECO-ah sawn a ni a, nimin khan Art & Culture minister C Lalsawivunga'n a hawng. Minister chuan, museum chu thil hlui dah khawmna hmun chauh ni loin, hnam nun, zia, chanchin leh ro hlute vawn ṭhatna a nih thu a sawi.

Mizoram State Museum thar hi September 18, 2007 khan sak ṭan a ni a, October 2, 2012 khan sak zawh a ni. Sak zawh aṭanga kum sarih dáwnah, July 25, 2019 khan Art & Culture department hnenah hlan a ni a; Art & Culture department kuta a awm aṭanga kum sarih hnuah hawn a ni ta chauh a ni. Museum awmna lai hi MINECO-a MPSC pisa thlen hmaah a ni a; Museum chungah gallery pakua bakah archaeology section pakhat a awm.

C Lalsawivunga chuan, "Museum hi thil hlui dah khawmna hmun chauh ni loin, hnam nun, hnam zia, hnam chanchin leh hnam ro hlute vawn ṭhatna hmun pawimawh a ni. Hun kal tawh leh tun inkara inzawmna leilâwn hlu tak a ni a, hnam identity leh cultural heritage humhalh leh hmasawnna kawnga pawimawhna lian tak kengtu a ni," a ti.

Mizoram State Museum chu Mizoram leh hnam darthlalang a nih thu sawiin Minister chuan, "A enkawl kawngah mawh kan phurh vek a, kan tu leh fate'n inzirna hmuna an hman ṭangkai theih nan ṭan lak a ṭul," a ti a; Museum tlawhtu apiangin hlawkna an chan zel a beisei thu a sawi.

Art & Culture Minister chuan, Mizoram State Museum chu multipurpose museum a nih thu sawiin, "A chhan chu, gallery thlûr bing bik awm loa chi hrang hrang pho chhuahna a nih vang a ni. Ṭhangtharte leh zirlaite'n museum aṭang hian thil tam tak an zir chhuak zel a, zirlaite tan Mizo history tifiahtu zinga pawimawh tak a ni. Mizote'n museum ngaihhlut nachang kan hriat thar a ṭul," a ti.

C Lalsawivunga chuan, Mizoramin museum a la nei tlem thu a sawi a, "Mizo nihna chiang zawka kan hriatna, Mizo chanchin thua kan hriat ṭhin a taka kan hmuh theihna a ni," tiin, museum ngai hlu tur leh tlawh tam turin zirlaite leh ṭhangtharte a chah.

Mizoram State Museum-a thil dah zinga a zatve aia tam chu miin an pek a nih thu sawiin Minister chuan, Mizote tana thil hlu bikte chu mipui tam zawkin an hmuh theih nan State Museum-ah hlan theih reng a nih thu a sawi bawk.

Mizoram State Museum hawnna inkhawm hi Art & Culture joint secretary TC Lalkhuma'n a kaihruai a, director Carol VLMS Dawngkimi'n Museum dinhmun tlangpui a sawi. Adviser to CM Lalmuanpuia Punte, MLA leh sorkar official dangte leh zirlaite an tel a ni.