KHAWTHLIR

CM châwl hahdam

Chief minister Lalduhoma chu châwl hahdam turin doctor-te'n an ràwn a; ina a awm hahdam chhungin hmuh tum rih lo tur leh phone-a biak leh message thawna insûm turin mipui ngen an ni. Sorkar thuchhuah tarlan danin, CM hi October 24, 2026 aṭang vel khan a chauh deuh avangin a inentir a, doctor-te'n a taksaah fel lo hmu lo mah se, ni eng emaw ti chhung chu châwl hahdam turin an ràwn a; nimina hun an hmanna turte pawh a ṭhulh a ni.

MYC-in inelna siam

Mizoram Youth Commission chuan nimin khan Janjatiya Gaurav Diwas Pakhwada pualin IPR Auditorium-ah Storytelling & Translation Competition an buatsaih a, Aizawla college panga aṭangin zirlai 21 an tel. Translation Competition-ah FC Lalrinfela, ICFAI University pakhatna a ni a, K Lalngaihawma leh Rosylin Malsawmsangi, T Romana College zirlai ve vete'n an dawt. Vawiinah Story Telling Competition buatsaih a ni ang.

Kolasibah review meeting nei

Kolasib District Development Coordination & Monitoring Committee (DISHA) chuan nimin khan review meeting an nei a, Committee chairman Richard Vanlalhmangaiha, Lok Sabha MP-in kaihhruaiin, bialtu MLA Lalfamkima, district bawrhsap H Dolianbuaia leh sorkar official-te an tel. Lok Sabha MP chuan DISHA member-te chu rawtna lutte chak taka bawhzui ṭhin tur leh chak zawka hna thawh a nih theih nan theihtawp chhuah zel turin a chah.

Tourist Destination Challenge

Tourism hmasawnna tura district hrang hrang inelna, 'Chief Minister's Tourist Destination Challenge' chungchangah nimin khan Serchhipa sorkar hotute leh pawl hruaitute'n bawrhsap Paul L Khuma hoin hmalak dan tur an rel. Tourist Destination Challenge-ah hian lawmman Rs 1,00,000, Rs 1,50,000 leh Rs 2,00,000 ruahman a ni a, November 25-27, 2026 khian district-te'n an project siamte an sawifiah dawn a ni.