Operation Trident-ah Mizoramah mi 7 an man; 'Hlawhtling takin kan nei thei' - K Sapdanga

Home minister K Sapdanga chuan nimin khan a pisaah Mizoram Police, Narcotics Control Bureau (NCB) leh Directorate of Enforcement (ED) ten ruihhlo tawlhrûkna chhu chat tura beihpui an thlak, Operation Trident chungchang a sawifiah a; Mizoramah ruihhlo tawlhruknaa inhnamhnawih mi pasarih man an nih thu sawiin, Operation chu hlawhtling taka an neih theih thu a sawi.

Home Minister sawi danin, October 23, 2026 khan Operation Trident kalpui niin, Mizoramah chuan hmun 13-ah beihpui thlak a ni a; mi pasarih bakah, cheng nuai 12 leh detonator 500 man a ni. Aizawlah Lalduhawma leh Suitei te man an ni a, Champhaiah Teresa, Lalbiakhluna, Lalliansanga, Pency leh Laltlanzova Pautu te man an ni.

Ruihhlo tawlh hluar lutuk tudai tur leh ruihhlo tawlha inhnamhnawih lian (kingpin)-te man chhuahna turin Mizoram Police, NCB leh ED ten Operation Trident an kalpui thu K Sapdanga chuan a sawi a, "Operation hi Mizoram, Assam leh Manipur-ah kalpui a ni. Agency hrang hrang aṭanga lak khawm team 38 chuan hmun 38-ah a rualin joint operation an nei a, Mizoramah chuan Aizawl, Champhai, Lawngtlai leh Zokhawtharah beihpui thlak a ni. Mizoram bakah Manipur leh Assam nen operation-ah hian mi 18 man an ni. Bank account 1,424 leh cheng vbc 17.82 hù hrên a ni bawk a; chhui zui mek zel a ni," a ti.

Operation Trident-ah hian ruihhlo kaihhnawih thil eng emaw zat man a nih thu sawiin Minister chuan, "Mizorama drugs kingpin leh an thawhpuite beihna kawngah intelligence in share leh thawhhona ṭha tak a awm. Ni eng emaw zat chhung intelligence thuruk lak khawmte finfiah a ni," a ti a, a hnuah target-te thliar hran leh a nih thu a sawi.

K Sapdanga chuan, Mizoram Police leh central agency-te inrâwnkhawmna high level-a neih fo hnuah, drugs syndicate-te logistics leh an sum chet velna a ruala tihchhiatna tur uluk taka duan a nih thu a sawi a, "Hmun harsa leh zau tak tak ni mah se, department hrang hrang thawhhona a ṭha tak a, tih tur engkim tihhlawhtlin a ni. Man tura tih zingah tlan bo emaw, an thil tih dik lote thup bo hman an awm lo," a ti.

Operation Trident hian state ramri paltlanga inzawm khawmna mumal tak nena ruihhlo tawlhruk beihnaah thawhhona ṭha nen uluk taka chhui pawimawhzia a lantir tih sawiin Sapdanga chuan, "Mizoram Police, NCB leh ED te thawhhona ṭha tak nena chetna hian ruihhlo tawlhruknaa inhnamhnawihte chauh ni lo, sum che vel lo buaipui tute leh chumi thlawptu rinhlelh zawng zawngte nasa takin an chêt velna a chhu chat ngeia rin a ni," a ti a, theihtawp chhuaha an vil zui zel dawn thu a sawi.

Home Minister chuan, Mizoram Police-te'n Mizoram chhung leh India ram mai ni lo, international drug smuggling network (khawvel huapa ruihhlo tawlh inthlun zawmna)-te state pawna agency-te nena thawhhona hmangin ruihhlo kaihhnawiha sum hmuhte tihchhiat zel a tum tih a sawi a, "Kan tum ber chu drugs free Mizoram leh drugs free India siam a ni. 100% chuan a harsa maithei a, 90% vel tal chuan hlawhtlin theih kan duh a, kan ṭang khawp mai," a ti.

Operation Trident chu a lian tak zet tih sawiin Minister chuan, "Kan sawi chhuah thiam phak bâkin a lian. A hun hmain mipuiin engmah an hre lo a, hei hi kan hlawhtlin theih chhan pakhat a ni. Delhi lam pawhin an rawn ngaihven reng a, an chungah kan lawm tak zet," a ti a; Mizoram chu ruihhlo kalkawng a nih avanga a hminghliauna ṭhinte tihreh turin theihtawp an chhuah zel dawn thu a sawi.

Zawhna chhangin Home Minister ṭawiawmtu police officer-te chuan, Operation Trident hnuaiah ruihhlo tawlhruk dan chhui mek zel a nih thu an sawi a, "Mizoramah man belh tur pawh an la awm a rinawm. Kan mi mante hi Mizoram Police kutah an la awm. Thurûk vawn kawngah central agency-te'n Mizoram Police-te min fak hle. Thuhretu neih kawngah pawh Mizote min fak a, operation pakhatah mi pahnih zel an duh a, zing hma taka chet ngai a ni. Mahse, thuhretu ṭha tak kan nei thei," an ti.