HM-in police training mek a tlawh; Dik taka police lâk a zawngchhang tlak - K Sapdanga

Home minister K Sapdanga chuan nimin khan Police Training School (PTS), Thenzawla police cadre promotional training mekte a tlawh a; dik taka police lak chu zawngchhang tlak an tih thu a sawi.

HM K Sapdanga chuan, police awmzia la hre lêm lo, police tura lak thar mi 259 basic trainee-te hmaah thu a sawi tawh thu sawiin, "An ṭhut dan, an mitmeng, an hawiher han hmuh khan a lawmawm veng veng. MA leh BA degree nei ṭhahnem tak an awm a, constable atan basic course an train a, an zir san an chapopui lo. An hun âwlah library an hmang ṭangkai tihte kan lo hria a ni. Dik taka police lak hi zawngchhang tlak kan ti a, dik taka lak zel kan tum," a ti.

Home Minister chuan, Mizoram Home Guard volunteer mi 94 lak tum a nih thu leh mi ṭhahnem takin an dil thu sawiin, "Duh ni ila kan duhzawng kan la thei. Mahse, dik taka lak kan duh avangin dan kan siamṭha a, merit-a lak kan tum. Police constable 350 la thar turin kan inbuatsaih mek bawk a, dik thlapa merit hman kan tum. Dik taka lak hi kan duh dan a ni," a ti a; a thiam leh theihna nei ṭha apianga lak chu kawng tinrengah a ṭhat thu a sawi.

An kaisanna atana police training mekte zingah ṭhenkhat chu duhsaktu neih ṭhat vanga lak leh sum sênga lak an nih mai theih thu sawiin Sapdanga chuan, "Eng ang kawnga lak pawh ni u la, tunah chuan Mizo mipui innghahna Mizoram Police uniform in ha mek a, in dinhmun aṭanga kai sâng tlaka ngaih in ni a, mawhphurhna sang zawk pek theih turin training in nei mek. In recruitment-ah khan politics rawng a lo kai a nih pawhin, in training-ah hi chuan politics rawng a kai lo. Mizo mipui rawngbawltu in ni tawh," a ti.

K Sapdanga chuan, police-chu hi khawi hmunah pawh mipui hmuha sorkar lan chianna ber leh hmasa ber an nih thu sawiin, "Training chhuak ṭha viau ta u la, nangmahni kaisanna atan chauh a pawimawh a ni lo a, Police department tan a pawimawh hle dawn a, a chhawrtu tur chu Mizoram mipui an ni ang," a ti a; ngawrh taka an inzir mek laiin an mitthlaah Mizoram mipui châm lian ber tura a duh thu sawiin, theihtawp chhuah turin a fuih.

Home Minister chuan police-te chu an hriselna veng ṭha tura chahin, "Zu leh ruihhlo hi i hmelma lian ber a ni a, i fihlim lo a nih chuan a ei chhia ang che. I chhungte tan harsatna i siam ang a, i uniform i tibawlhhlawh ang a, hlawh neia chhawr tlak loh i ni thuai dawn. Sorkarin dan a siam thar a, hlawh phû tâwka thawk thei lote tan Special Pension Scheme a awm a, duh loh ngawt a rem lo ang," a ti a; harsatna tâwk, mahni inchhan chhuak zo lote chu hotute pan hreh lo turin a chah.

Mi mangangte'n police uniform ha an hmuhin an thla a muang sawt ṭhin tih sawiin K Sapdanga chuan, "An thlamuan chhan an dawn ngei a ngai. Police station-a rawn zualkote hi chu mangang tâwpkhâwk an ni deuh zel a, lungawi taka an chhuahsan theih nan lo ṭanpui ngei tur a ni. Pu chuam neih awih a ni lo. Police-a i luh chhan chu eng pawh ni se, tute emaw venthâwn zui a thiang lo. I pu chuam chu in unit-a i chung chiaha mite kha an ni," a ti.

Thuthar thehdarhtute chungchang sawiin Home Minister chuan, "Media hlutna leh thil tih theih dan ka hre ve nual. Indo thlawhna bomb leh puakrang tam tak pai chunga feh chhuak ang an ni a, mi dik leh ṭha chu kut an thlak ngawt ngai lo a, ram tana pawi khawih nia an hriat erawh chu an hlahthlem ngai lo. Chu chu hriain, vawiina kan inkhawm hi a tam thei angin min rawn hmuhpui se ka duh," a ti a, amah ṭawiawmtu MJA member-te chungah a lawm thu a sawi.

Inkhawm hi PTS principal Lalṭhakima'n a kaihruai a; IGP (Training) Megna Yadav leh AIG (Training) J Lalṭhafamkimate'n Home Minister an ṭawiawm a ni.

PTS, Thenzawla in-service training nei meite hi junior under officer 97, senior under officer 89, platoon commander course ti mi 87 an ni. Chawlhkar 12 training tur an ni a, September 1-ah ṭanin, November 20, 2026-ah an zo ang.

Police bakah hian Excise & Narcotics department aṭangin constable, driver, sub-inspector leh inspector basic training mek 39 an awm bawk a; anni hi thla 6 chhung training tur niin, February 2027 laihâwlah an chhuak dawn a ni.