Dan loa sumdawng rinhlelhawmte thuneitute hnena hriattir turin ngen

Mizoram Merchant Association (MIMA) Action Committee chuan thuchhuah siamin, Mizoramah dan loa sumdawng an tam tawh hle a, a bikin Aizawlah an tam zual niin an tarlang a; dan loa sumdawng rinhlelh neite chu sorkara thuneitute hnenah emaw, MIMA hnenah emaw hriattir turin mipui an ngen.

MIMA Action Committee din chhan sawiin, "Dan zawm loa sumdawnna kalpui nia rinhlelhna awmte enfiah a, dan anga hmalak a nih theih nan MIMA Action Committee din a ni," an ti a; in sakna bungrua, thawmhnaw leh ei leh bar thlengin, home delivery hmanga zuar chhuaktu an pun zel thu leh, chungte chuan dan dik taka Mizo sumdawngte eizawnna a nghawng thu an tarlang.

Home delivery tia vâk kual ṭhinte chu an dàwr hmain dan loa sumdawng an nih leh nih loh finfiah hmasa tura ngenin MIMA chuan, "Dan zâwm loa sumdawng nia rinhlelhna awm chu thu dik leh finfiah theihna nei Police, Aizawl Municipal Corporation, MIMA leh department mawhphurtu dangte hnenah report turin kan ngen.

MIMA Action Committee chuan, trade licence, ILP leh sumdawn phalna mamawh dangte enfiah turin thuneitute an ngen a, "Dan zawm lohna a awm a nih chuan dan anga hma la turin kan ngen a ni," an ti.

ILP sponsor, dawr leh sumdawnna hmun luahtir leh Mizo hminga hnam dangte'n sumdawnna an kalpui chungchangah nasa zawka fimkhur turin MIMA Action Committee chuan Mizo mipui an ngen a, "A bikin non-tribal sponsor emaw, mahni in sumdawnna hmun luahtir emaw, hming hawha sumdawnna kalpuitir kan awm a nih chuan a rang lama lo inchingfel turin kan ngen," an ti bawk.

MIMA Action Committee hian Mizo ram leh hnam eizawnna humhalh chu mipuite mawhphurhna a nih thu sawiin, Mizote eizawnna humhimpui tur leh sumdawnnaah Mizote chîm ral an nih loh nan an hmalakna thlâwp turin mi tin an sáwm a ni.