Mimal damdawi-in lakah thinlung tikhauh lo turin MPCC-in Health Minister an chah

Mizoram Pradesh Congress Committee (MPCC) chuan Mizoram Universal Healthcare Scheme (MUHCS) sum chu mipui pawisa a nih thu leh MUHCS sum hman dan zawng zawng langtlang taka kalpui a ṭul thu an sawi a; Health minister Lalrinpuii chu MUHCS zawm lo mimal damdawi-inte lakah thinlung tikhauh lo turin an chah.

MPCC hruaitute'n nimin khan Aizawl Press Club-ah thuthar thehdarhtute an kâwm. MPCC spokesperson Dr Lallianchhunga chuan, MUHCS chu mipui pawisa thawh khawma kalpui a nih avangin a hmang tur zawng zawngin hmang thei vek se an duh thu a sawi a, "MUHCS sum hi Health Minister pawisa a ni lo a, mipui pawisa a ni a, vaibelchhe eng emaw zat chu sorkar hnathawk leh pensioner-te an hlawh aṭanga pek luihtir an ni. MUHCS-a inziak lutte'n inziah luh man sáng tak an chawi bawk. MUHCS sum hman dan zawng zawng langtlang taka kalpui tur niin kan ngai," a ti.

Dr Lallianchhunga chuan, Mizoram páwna damdawi-inte rate ṭha takin inremna ziahpui an nia sawiin, "Kan rama private hospital ṭha tak takte nena inremna kawng zawng lo a, Pharoa thinlung khauh tak ang Health Minister-in a la pu tlat hi hriatthiam harsa kan ti. MUHCS-a inziak lut si, Mizorama MUHCS empanelled hospital-a khum chang lo private hospital-a enkawl ngai damlo eng emaw zat an awm reng," a ti a; damlote tan rorelna dik an phût thu a sawi.

Mizoramah MUHCS la zawm lo private hospital pakua an awm thu sawiin Lallianchhunga chuan, "Mipui mamawh dan enin an grade mila MUHCS zawm ve an hreh loh thu sorkarah an thlen tawh chungin, ZPM sorkar hi chhuanlam siama tihkhawtlai ngar ngar tum a ang. Private hospital ṭhenkhatte'n an zawm theih loh tura MUHCS kalpui luih tlat hi healthcare system ṭha a ni thei lo a, Pharoa thinlung ang maia a thinlung tikhauh lo turin Health Minister kan beisei a ni," a ti.

MPCC thupuangtu chuan, "MUHCS hi a chhia kan ti lo a, mahse, hmang pha lo leh hmang thei lo chhungkaw tam tak an awm tih hi sorkarin pawm se," a ti a; MUHCS-a inziak lutte'n an hman vek theih ngeina turin huapzo taka thutlukna siam turin sorkar an phût tih a sawi.

Dr Lallianchhunga chuan, kum 2008-2018 chhunga Congress sorkar kha hriselna kawngah a thawk ṭha hle niin a sawi a, "NITI Aayog-in 'Health states, progressive India: report on the ranks of states & UT' a tihchhuahah kum 2019-20 report-ah khan kum 2018-19 data hmangin Mizoram chu state tê zinga ti ṭha ber a ni," a ti.