Vanapa Hall-ah Lehkhabu Pho Rûnpui

Mizo Writers Association (MWA) chuan nimin khan Vanapa Hall-ah Lehkhabu Pho Rûnpui (LPR) vawi rukna an buatsaih ṭan a, Information, Public Relations, Printing & Stationery (IPRPS) minister B Lalchhanzova'n a hawng.

LPR hi October 24, 2026 thleng huaihawt a ni dawn a, chawhma dar 10 aṭanga tlai dar 6 thleng tlawh theih a ni ang a, Zirtawpni zan bikah chuan zan dar 9 thleng hawn a ni ang. Lehkhabute chu a man pangngai aia tláwmin zawrh a ni.

Hawnna inkhawm hi Organising Committee chairman Dr Lalsangzuala'n a kaihruai a; minister B Lalchhanzova chuan, ziakmite chu huaisen taka an chhungril ngaihtuahnate phawrh chhuak ṭhin an ni a, zirna chawisangtu, ram meichher kengtute an nih thu sawiin, LPR chu Mizo mipuiin lehkhabu hlutna an hmuh thar lehna atana pawimawh a nih thu a sawi.

IPRPS Minister chuan, lehkhabu chhiar tam hnam chu zirnaah pawh hma an sawn ngei ngei thu sawiin, "Zirna hi mi rethei leh hausa thliar lo, mi zawng zawng huang khata min dah theitu a ni," a ti a; ṭhalaite leh zirlaite'n lehkhabu an chhiar tam a ṭhat thu sawiin, "Lehkhabu kan ngaihhlut chuan engtikah mah ram tê kan nih ngai lo ang," a ti.

LPR huaihawtna atan hian MWA chuan Labour, Employ-ment, Skill Development and Entrepreneurship department aṭangin Rs 80,000 an dawng a; mi 128-te lehkhabu chi hrang hrang 1,000 vel pho chhuah a ni. MWA hi kum 1977 khan din a ni a, member 298 an awm mek.