HM-in Police Hqrs-ah e-office a hawng: 'Police hmasawnna kan ngai pawimawh' - K Sapdanga

Home minister K Sapdanga chuan nimin khan GS Arya Mess, Police Headquarters (PHQ)-ah PHQ hman tur e-office system a hawng a; sorkarin police hmasawnna a ngaih pawimawh thu a sawi.

K Sapdanga chuan, Chief Minister kaihhruaina hnuaiah hmanraw changkang zawkin Mizoram Police thuam chak zel an tum thu a sawi a, "Police-te infrastructure, technology leh an hamṭhatna lama tihhmasawnna kan ngai pawimawh," a ti.

PHQ tana e-office hawn chu a bul ṭanna a nih thu sawiin Minister chuan, "District headquarters leh battalion lamahte pawh chhunzawm kan tum zel ang," a ti a; e-office a hlawhtlin theihna tura hma latu DGP leh a thawhpuite bakah, National Infomatics Centre (NIC) chungah a lawm thu a sawi.

Home Minister chuan, technology neih ringawt a tâwk loh thu sawiin, "Technology chu a hmanrua a ni mai a, a hlawhtlinna tak tak chu keimahniah a awm. PHQ-a thawktute hi e-office ṭha taka hmang thiam ngei turin ka chah che u a ni," a ti.

Police chu sorkar hmel lanna pawimawh an nih thu sawiin K Sapdanga chuan, "Police-te hi hna thawk ṭha, langtlang leh taima turin mipuite'n min beisei a ni," a ti a; mipui beiseina a hlawhtlin theih nan an hmanraw neihte pawh a tunlai a ṭul thu a sawi.

E-Office hi PHQ hnathawh tihchangtlunna tur rahbi a ni a, system hian file kal chak zawk, official correspondence leh thutlukna rang, langtlang zawk leh lehkha hman tlem (paperless) a thlen tura beisei a ni.

PHQ hian office branch 18 leh personal branch 17, belhkhawmin branch 35 a nei a; officer 23 leh dealing officer 53 tan profile mapping zawh a ni tawh. PHQ hi Mizorama e-office system hmang directorate pariatna an ni a; e-office system hlawhtling leh tluang taka kalpuina tur hian NIC chuan internet speed 60 mbps an pe a ni.