Lallianmawia Pachuau hlate zirho a ni

Nimin khan Aizawl North College-ah Lallianmawia Pachuau hlate zir chianna hun hman a ni a, minister K Sapdanga'n hmanpuiin, 'International Seminar on Legendary Mizo Singer and Songwriter Lallianmawia Pachuau Hlate' tih lehkhabu leh 'Chawngzil Bu VI-na' tih lehkhabute a tlangzarh.

K Sapdanga chuan, Lallianmawia Pachuau chu a hla phuah hun laia a kum leh a hla thu ngaihtuahin mi ropui leh danglam bîk a nihzia a lan chian thu a sawi a, "A hun laia hla lo piangte kha ennawn leh hian Lallianmawia hlate hi a danglam bik em em a, a hla thute a thûk bikin a ril em em vek mai. Love song a siam a, gospel hla a siam a, lâr tak vek a ni a, zai a thiam a, talent a nei ṭha em em a ni," a ti.

Lallianmawia Pachuau puala hun an hmang thei chu an vannei tih sawiin Sapdanga chuan, "Aizawl North College-a thawktute leh Lallianmawia Pachuau chhungkaw inpekna a ropui a, zirlaite tan hlâwkna ropui tâk a chhawp chhuah ngei ka beisei," a ti a; tun aia ropui leh changtlung zawka hun la buatsaih leh ni se a duh thu a sawi.

'International Seminar on Legendary Mizo Singer and Songwriter Lallianmawia Pachuau' hawnna inkhawm hi ANC associate professor K Vanlalawia'n kaihruaiin, principal Dr Saroj Laldinpuii pawhin thu a sawi a; Lallianmawia tupa Eddy Zosangliana Colney-in thu a sawi bawk.

Rohmingthanga Ralte (Hrangbana College), Lalnunzama Khiangte (MZU), VL Muanpuia (ICFAI University), G Lalnuntluanga (Kolasib College), Lalremruati Ngente (Mizoram Christian College), Dr F Lalzuithanga (Khawzawl College), H Lalawmpuia (Kolasib College) leh Laltlanmawia Vuite (Kamalanagar College) ten thupui ṭhen hrang hrang an sawi bakah, sawiho a ni.