National average pha tura ṭan a ngai - Education Minister

School Education minister Dr Vanlalthlana chuan, Mizorama zirnaah subject hrang hrangah ram pum huap chawhrual a phâk loh avangin, national average pha tura ṭan a ngaih thu a sawi a; Mizoram chu India ramah state drug policy nei hmasa ber a nih dawn thu a sawi bawk.

Minister hian nimin khan MBSE conference hall-ah Mizoram Board of School Educatoin (MBSE)-in an buatsaih, 'Random Examination 2025' Report Card leh mobile application pahnih - Confidential Material Tracking & Monitoring System (CTMS) leh School Report System (SRS) te a tlangzarh a ni.

Dr Vanlalthlana chuan, zirlaite'n an zir chhuah a pun theih nan sum neih loh chhuanlam a awm theih loh thu a sawi a, "Kan ram zirnaah hian subject hrang hrangah national average kan la pha lo a, hei hi pha tura kan ṭan a ngai a, random examination leh common question-te hian min puih theih beisei a ni," a ti a; Random Examination 2025-ah 65% an pass chu lawmawm a tih thu leh, SCERT-in Standardized Assessment for Elementary Schools (SAfES) chuan zir chhuah a tihsan a beisei thu a sawi.

Tui a pûtin a puh ṭanna dap chhuaha tihpin a ngai ṭhin tih sawiin Minister chuan, "Zirlaite'n a bulṭhut an thiam loh chuan entrance hrang hrangah kan dinhmun a sang thei lo a, a lo lan chhuahna lêr thlìr mai loin, a bul chhui a ngai," a ti.

Education Minister chuan, Mizoram chu India rama damdawi hmangsual nasa ber a nih thu sawi a ni ṭhin tih sawiin, "Hei hi khawi aṭanga lo inṭan nge tih kan chhui a ngai. India ram pumah state drug policy a nei hmasa ber kan ni dawn a, tunah hian district-ah inràwnkhawmna kalpui mek a ni," a ti a; naupangte'n middle school an kal lai aṭangin sual an zir ṭan ṭhin thu a sawi.

Dr Vanlalthlana chuan, M/S aṭangin moral reform ṭan tum a nih thu sawiin, "An en duh zawng comics hmangin awm dan mawi, nungchang ṭha, tlawmngaihna leh aia upa zahna te inzirtir tum a ni," a ti.

Education Minister chuan, zirna siamṭhat nan question design a ṭhat a ngai tih sawiin, "Random Examination leh Common Question te hian min puih theih beisei a ni," a ti a; sikul ṭhenkhatin pawl 9 zirlai an zirtir kim loh avangin zirlaite'n a bulṭhut an man loh phah thu sawiin, zirtirtute chu a kim thei ang bera zirtir turin a chah.

Tlangzarhna inkhawm hi MBSE chairman JH Zoremthanga'n a kaihruai a, School Education secretary K Lalthawmmawia leh MBSE secretary Sarah Lalengzami Pachuau te pawhin thu an sawi. MBSE deputy secretary Lalrinmawia Ralte-in Random Examination 2025 dinhmun tlangpui, CTMS leh SRS kalhmang turte a sawifiah.

Random Examination 2025 hi Mizoram dinhmun hriat nan pawl 3, 6 leh 9-ahte district tinah buatsaih a ni a, sikul 232-a zirlai 8,856-te'n hmachhawin, zirlai 5,778-in mark 40% an hmu tling a, 65.24% an pass.

CTMS hi board exam centre superintendent-te'n exam thil pawimawh chi hrang hrang vawn ṭhat, chhui leh report nana an hman tur a ni a; SRS hi exam chungchanga MBSE leh sikul indawr tawnna tur a ni.