MUHCS-ah mimal damdawi-inte nen inremna siam turin sorkar a inpeih: 'Páwl kan dàwr tawh dawn lo' - Lalrinpuii

Health & Family Welfare department chuan, Synod Hospital bungrua/hmanrua (facility) neih ang nei mimal damdawi-inte chu Synod Hospital nena an inremna anga Mizoram Universal Healthcare Scheme (MUHCS) zawm turin inremna an siampui theih reng thu a tarlang. Health minister Lalrinpuii chuan, inremna siam turin damdawi-in páwl an dàwr dawn lo a, damdawi-in mal zel an dàwr dawn tih a sawi.

HFW department chuan thuchhuah siamin, tun hnaia chanchinbu leh social media-a sorkar leh Synod Hospital inremna rate anga Mizorama MUHCS la zawm ve lo mimal damdawi-in (non-empanelled hospital) hrang hrangin MUHCS zawm an hreh loh thu an tarlan chu sorkarin a hria a, lawmawm an tih thu an tarlang.

Health department chuan, "Mizorama MUHCS non-empanelled hospital zingah Synod Hospital, Durtlang facility neih ang nei apiang chu sorkar leh Synod Hospital inremna ang rate-a MUHCS hnuaia empanel turin sorkar chu a inpeih reng," a ti.

Vanglaini palai zawhna chhangin Health minister Lalrinpuii chuan, Aizawla mimal damdawi-in pathum - Ebenezer Medical Center, Trinity Hospital leh LRM Hospital ten Synod Hospital facility ang an neih thu a sawi a, "An duh phawt chuan engtiklai pawhin Synod Hospital nena inremna kan ziah angin kan ziahpui thei a, anmahni pawh ziakin kan hrilh tawh," a ti.

Health Minister chuan, Synod Hospital leh Mizoram pawna damdawi-inte chu rate-a an inremna a sân loh thu sawiin, "Phai damdawi-in bikte hi natna khirhkhân bik tak tak erawh an rate a sang deuh a, a loh theih loh. Hei hian cancer nazawng a huam lo," a ti a; phai lam damdawi-in inremna an ziahpuina a sáng anga sawi an awm chuan an hriat chian loh vang a nih thu a sawi.

MUHCS atan pawisaah harsatna an neih rih loh thu sawiin Lalrinpuii chuan, "Kan buaina ber zawk chu bill lut a tam tham a, manual-in thil tih a ni a, duh angin kan ti chak thei lo. Pawisa chu a awm a, tihfel angte chu pek nghal zel an ni. Tunah chuan manual loa tih theih dan tur kan ngaihtuah mek a, chumi hunah chuan a zia lehzual ang," a ti.

HFW Minister chuan, Non-Government Hospital Association, Mizoram (NGHAM) an dàwr tawh dawn lo tih sawiin, "MUHCS zawm lote'n rawn zawm vek se kan duh a, mahse, pawl ang chuan kan dawr tawh dawn lo a, damdawi-in mal zelin kan dawr tawh dawn," a ti a, damdawi-in dinhmun ang zelin inremna ziahpui an duh reng thu a sawi.

MUHCS hi Mizoram bikah mimal/kohhran damdawi-in 28 leh private daycare centre pangain an zawm tawh a ni.