Children's Week 2019 pualin rally buatsaih

November 14-a Children's Day (Naupangte Ni) denchhenin Children's Week 2019 buatsaih a ni a, nimin khan Serchhip leh Lawngtlaiah rally buatsaih a ni.

Serchhipah chuan Project Himna MADAT, District Child Protection Office leh District Legal Services Authority-te huaihawtin nimin khan Children's Week 2019 hman ṭan niin, Serchhipa middle school leh high school zirlaite tan kawngzawh huaihawt a ni a, district bawrhsap Sangchhin Chinzah-in a vailiam.

Kawngzawhah hian zirlaite'n zûk leh hmuam leh ruih theih thil ṭhat lohzia tarlanna thuziak hrang hrang an keng a; zirlai naupangte, Serchhip District Legal Services Authority leh Project Himna MADAT-a thawktute an tel. Vawiinah pawh a hmun ngaiah hun hman leh tur a ni a, thupui chu 'Our children - Our future - Role of parents & teachers’ tih a ni ang.

Nimina rally neih zawhah Serchhip Auditorium-ah inkhawm buatsaih a ni a, Ser­chhipa district child protection officer (DCPO) Lalsiampuii Tochhawng-in kaihruai­in, SP R Sathyasundaram chuan a hmanpui. Serchhip SP chuan, zirlai naupangte chu zu leh ruih theih thil chi hrang hrang laka filhlim tur te, mi puitling ni tura an ni tin nun uluk turtein a fuih a; ruihlo tawlhrutute leh zuartute hremna dan hrang hrangte a sawi bawk.

Project Himna MADAT (Mizoram Against Drugs Alcohol Tobacco) aṭangin Serchhipa medical officer Dr Zodinmawii'n vaihlo zûk leh hmuam leh ruihhlo chi hrang hrangte ṭhat lohna chi hrang hrang a lem nen a hrilhfiah a; Gan Sabra Society, Aizawla chief functionary Lucy Lalremruati Chhangte-in HIV/AIDS laka naupangte an him theihna tur leh inven dan turte a sawi a ni.

Lawngtlaiah chuan naupangte tan Mini Marathon buatsaih a ni a, Lawngtlai chhim lama 71 RCC hmun aṭanga tlân ṭanin, Lawngtlai Bazar Venga Areopagy thleng an tlân. Mini Marathon ṭannaah DCPO Mary Lalremruati'n naupangte a vailiam.

Areopagy-a a khârna inkhawmah Lawng­tlai SDC Vabeimozachhi Chozah-in thu sawiin, Project Himna-MADAT hnuaia hmalaknaah vaihlo zûk leh hmuam leh ruihhlo chi hrang hrang laka inthiar fihlim a ṭul thu a sawi a, naupangte chu fihlim vek turin a chah.

Mini Marathon-ah hian Lawngtlaia naupang ṭhahnem tak an tel a; kum 10-14 hmeichhiaah Christina Lalzawmpuii chu pakhatna a ni a, mipaah Andria Vanlalhmana pakhatna a ni. Kum 15-17 inkar hmeichhiaah pakhatna Nancy Lawmsangzuali leh pahnihna Lalrinfeli te an ni a, mipaah Reubena chu pakhatna a ni. Lawmmanah pakhatnain Rs. 1,000, pahnihnain Rs. 700 leh pathumnain Rs. 500 ṭheuh an dawng.