CYMA, CKṬP, Police leh Excise ten ruihhlo ngaite counselling neihpui

Central YMA leh Central KṬP chuan October 8, Ningani zan khan Mizoram Police leh Excise & Narcotics department-te puihnain Aizawl khawlaia ruihhlo ngai, vâk rawlaite CYMA Hall-ah an hruai khawm a, counselling neihpuiin, Pathian thu leh nun dan ṭhate an hrilh. Hruai khawm zingah HIV vei hmuh chhuah thar an awm.

Hunserh inkhawm neih niin, CYMA vice president Prof. Lalnuntluanga'n a kaihhruai a, CKṬP assistant leader Nicholas Lalbiakzuala'n hunserh hmangin, CYMA president R Lalngheta chuan fuihna thu a sawi. CYMA finance secretary MS Ralte, CADS convener kaihhruainain CKṬP lamin counselling class hun an hmang zui a ni.

Excise & Narcotics department thawktute chuan October 8 khan zingkar aṭangin Vanapa Hall leh a chhehvela ruihhlo ngaite an khawm a; zan tir aṭangin CYMA hnuaia CADS leh Zone Anti Drugs Squad (ZADS) hrang hrang 11 aṭangin an huam chhunga ruihhlo ngaite an khawm bawk a, mi 136 hruai khawm an ni.

Ruihhlo ngai hruai khawmte chu Mizoram State AIDS Control Society (MSACS) lamin an thisen endiksakin, HIV test leh syphillis screening tih a ni a; mi 52-te thisen lak niin, HIV vei hmuh chhuah an awm nual a ni.

He hunah hian CYMA, CKṬP, CADS leh ZADS bakah, Aizawl DEF aṭangin police 11 leh Excise & Narcotics department aṭangin mi 12 an thawk chhuak a; Upper Republic Branch YMA-in ei leh in an buatsaihsak a ni.