ESIC-ah mi 6,461 inziaklut tawh; Kolasib Branch hawn a ni dawn
Ministry of Labour & Employment hnuaia Employees State Insurance Corporation (ESIC)-ah Mizorama mimal sumdawnna 746 hnuaia thawktu mi 6,461 ziah luh an ni tawh a; vawiin hian Kolasib-ah ESIC Branch Office hawn a ni dawn.
Nimin khan IPR Auditorium-ah 'ESIC Mega Awareness Camp' buatsaih a ni a; mimal sumdawnna neitu hrang hrang an tel. ESIC insurance medical officer Dr Lalmuanpuii Pachuau-in ESIC hnuaia inziahluh dan leh hamṭhatna hrang hrangte a sawifiah a ni.
Dr Lalmuanpuii tarlan danin, Employees' State Insurance (ESI) Act hi private hnuaia thawkte hamṭhatna atan sorkar laipuiin kum 1948-a a din a ni a, he dan (act) hnuaia inziak lutte leh an chhungten dam lohna, nau pai leh nau neih chungchangah te, hnathawhna avanga ramtuileiloa awmte leh thihna hial tawh thlenga hamṭhatna (social security) a awm.
ESI Act hnuaia inziah luh hi mimal sumdawnna neitute duhthlanna ni loin, sorkar laipuiin tih ngei ngei tura dan a zam (statutory obligation) a nih avang leh hamṭhatna dawn tur chi hrang hrang a awm avangin mimal sumdawnna neitute leh heng hnuaia thawktute chu ngaipawimawha inziaklut ṭheuh tura ngen an ni.
ESIC hnuaiah hian mimal sumdawnna hmun engpawh, thawktu mi 10 aia tlem lo awmnate chu an inziaklut vek tur a ni a; tun dinhmunah Mizorama mimal sumdawnna 746 hnuaia thawk mi 6,461 an inziaklut tawh a ni.
Mizoramah hian tun dinhmunah ESIC hamṭhatna hman theihna damdawi-in pariat - Synod Hospital, ZMCH, Adventist Hospital, Greenwood Hospital, Alpha Hospital, LRM Hospital (Ramhlun), Trinity Hospital leh RIPANS Hospital bakah, diagnostic/laboratory pathum - Trinity Diagnostic Centre, Cross Imaging leh Genesis Laboratory-te a awm.
ESI Dispensary, Tuikhuahtlangah ESIC doctor, nurse leh lab. technician-te enkawlna a dawn theih bawk.
Kolasib, Mamit leh Hnahthial district hospital-te chu ESIC nena thlunzawm (empanelled) niin, Aizawl bakah Champhai leh Lawngtlaiah dispensary a awm tawh a; vawiin hian Kolasib-ah ESIC Branch Office hawn a ni leh dawn a ni.