Governor hoin RTI Week hmang: Thup nei loa langtlang taka thil tih hi kalphung ngheta neih tur a ni - Governor

Governor Gen. Dr Vijay Kumar Singh chuan nimin khan Assembly Annexe conference hall-ah Mizoram Information Commission (MIC) buatsaih Right to Information (RTI) Week, 2026 a hmanpui. Larsap chuan, sorkar rorelnaah thup nei loa langtlang taka thil tih chu kalphung ngheta neih tur a nih thu a sawi.

Larsap VK Singh chuan, RTI Act, 2005 chuan khua leh tuiten hriat duh an neihte zawhfiah theihna a siam sak bakah sorkar kalhmang an hriat thûk theih nante a pui a, thuneitute chu mawhphurhna nei an ni tih hriattirin, mipui leh sorkar inlaichinna a ti chak tih a sawi a, "RTI Act Section 4 hnuaia mipui hriat tur tlangzarh tura tihte chak taka bawhzui a ṭul. RTI hmanga zawhna dawn hnuah chauh zawhnate chhan tur tihna a ni kher loa, a theih chin chinah mipuite tana hriat ṭulte chu tarchhuah tur niin, thup nei loa langtlang taka hmalak hi rorelnaah kalphung ngheta neih zawk tur a ni," a ti.

RTI chu langtlang, mawhphurhna la ngam leh mipui tel vena sorkar din nana thil pawimawh tak a nih thu sawiin Larsap chuan, "Village Council leh Local Council-te thlenga RTI huamtir a ni hi a lawmawm hle a, hei hi mawhphurhna la ngam siam kawnga rahbi pawimawh niin, sorkar office-ah chauh lo pawh langtlang taka hmalakna a awm tih a entir a ni," a ti a; June 29, 2006-a din Mizoram Information Commission-in RTI Act 2005 kenkawh kawnga theihtawp a chhuah chu fakawm a tih thu a sawi.

Governor chuan tun hnaia RTI Online Version 2.0 tlangzarh a ni chu lawmawm a tih thu a sawi a, "RTI kaltlanga zawhna, ngenna leh ngaimawh zawng ṭhahnem tak thlen a ni ṭhin hian khua leh tuite dikna a pe a, tunlai thiamna hmang ṭangkaia RTI kalpui a ni hi a ṭha hle. RTI hi midang do leh ep rana chetna hmanrua ang zawnga thlir tur a ni lo a, rorelna khawl leh mipuite thlunzawmtu, inrintawnna leh mipui rawngbawlna thuam chakna, mawhphurhna lak ngamna chawilar nana hman zawk tur a ni," a ti.

RTI Week hman chhungin RTI Act chungchang zirtirna, awlsam taka hman theihna leh zawh hmasak kher ngai loa mipui hriat tur chin langtlang taka pholante chu uar lehzuala kalpui ni se a duh thu Governor chuan a sawi a; langtlang sorkar kalphung ngheta siam a nih theih nan te, mawhphurhna la ngam sorkar siam bakah khua leh tuite pawhin hriat tur pawimawhte an hriata hma an lak zung zung theih nante ṭanlakpui turin mipui a sawm bawk.

Governor hian college zirlaite puala RTI thuchham (slogan) inphuahsiaka tiṭhate hnenah lawmman a sem nghal a ni

RTI Week 2026 hmannaah hian state information commissioner Dr Lalzirmawia Chhangte chuan inlawmna thu sawiin, RTI Act chungchang leh hmalak dante a sawifiah a; ṭangkai taka RTI hmang ṭhin thlanchhuah mi pahnihten RTI chungchanga an tawnhriat leh hmasawn ngaihna lai nia an hriatte an sawi.