RTI Week pualin hun hman a ni

October 5 aṭanga ni 12, 2026 inkar chhunga Right to Information (RTI) Week hman mek pualin nimin khan Lunglei, Mamit leh Hnahthialah hun hman a ni.

Lungleiah chuan Convention Centre-ah bawrhsap Navneet Mann hoin hun hman a ni. Bawrhsap chuan RTI Week chu RTI Act chungchang leh a pawimawhna te, ṭha leh ṭangkai zawka hman a nih theih dan tur inzirtirna atante hman ṭhin a nih thu sawiin, "RTI Act hi sorkar inrelbawlna leh hna thawh hrang hrangte lang tlang leh felfai zawka kalpui a nih theih nana hma lakna pawimawh tak a ni," a ti.

Sorkar hna thawkte chu an thil tih leh thu tluknain mipui a nghawng tih hria a, mipuite hamṭhatna tur leh dan ang taka hna thawk tur leh thu tlukna siam ṭhin tur te, mipuiin sorkar an rin ngam theih nan RTI-in a phut anga lang tlang taka thil kalpui turte leh mipui laka an mawhphurhnate ṭha taka hlen chhuah tum turin Navneet Mann chuan a chah.

Lungleia RTI Week 2026 puala hun hman hi additional DC Rochuangkimi Khenglawt chuan kaihruaiin, zawhna leh chhanna leh sawihona hunte hman a ni.

Mamitah chuan RTI Week pual hian DC conference hall-ah Mamit bawrhsap Suvigya S Chandra hoa hman a ni.

Suvigya S Chandra chuan langtlang sorkar a awm theihna turin RTI chu duan a nih thu sawiin, "RTI Act kaltlang hian sorkar hna kal a lian aṭanga a te ber thleng pawha hriat theiha, zawh theih a ni," a ti a, sorkar tha tichak tur atan pawha pawimawh tak a nih avangin hmang ṭangkai turin kalkhawmte a sawm.

Kalkhawmte aṭangin RTI Act chungchang sawihona bakah zawhna leh chhanna hun hman a ni.

RTI Week hi Hnahthialah chuan DC conference hall-ah hman a ni a, khuallian Hnahthial bawrhsap K Vanlalruati chuan RTI hmanga information dil nachang hria kan tam ve tawh thu leh hei hi hmasawnna kawng pawimawh tak a nih thu sawiin, "RTI hi chu khua leh tui, tu pawhin sorkar thuneitute hnen aṭanga an hriat duh an hriat theihna tur, langtlang sorkar awm theihna tura duan a ni," a ti.

He hunah hian thupui thlan bik pahnih zirho niin, zawhna leh chhanna hunte an hmang nghal.