LRS department hi ram hmasawnna tura lungphum pawimawh tak a ni - LRS Minister
Land Revnue & Settlement (LRS) minister B Lalchhanzova chuan nimin khan Kolasiba an department hmalakna hrang hrangte a hmunah tlawhin, a enfiah a, Assistant Commissioner (Revenue) quarter a hawng nghal. LRS department chu ram hmasawnna tura lungphum pawimawh tak a nih thu a sawi.
B Lalchhanzova chuan thu sawiin, Revenue leh district administration (DC) kal hrang chu thil fuh lo tak a nih thu sawiin, "Minister ka nih tirh khan Revenue Assistant Commissioner (Aizawl North leh South) ṭhendarh a ni. Champhaiah pawh Assistant Commissioner office thar hawn thuai a ni dawn a, Thenzawlah pawh sak tura peihfel a ni," a ti.
LRS dept chu hmuh theih leh langsar takin awm lo mah se, ram hmasawnna tura lungphum pawimawh tak a nih thu sawiin LRS Minister chuan, "Hna kan chelh tawh chuan a thiam (expert) te ngaihtuah dan anga kan thawh a ngai," a ti a, Land Pulling System hmanga sorkar leh ram neituten ṭangkawpa hmunhma tihhmasawn theih nan ngaihtuahna sen a pawimawh thu a sawi.
B Lalchhanzova chuan LRS dept-ah chuan a chung lam aṭanga ruahmanna siam tawp aiin district level aṭanga sorkar finchhuah a pawimawh thu sawiin, "Eng department pawh enkawl ila, kan thawh chhan chu mipuite rawngbawl hi a ni. Kan vai hian department hrang ni mah ila, inzawmkhawm leh inmamawh tawn vek kan ni," tiin kalkhawmte a chah.
Bialtu MLA Lalfamkima, dy speaker pawhin thu sawiin, "ZPM sorkar inrelbawl tirh kum khatna chu sorkarin leiba rulh leh insiamrem nan a hmang. Chuti chung chuan hmasawnna kan hmu nasa hle. Kolasib district-ah pawh hun reilote chhungin sorkar hmalakna hmuh tur a tam a ni," a ti.
Assistant Commissioner (Revenue) quarter hi cheng nuai 66.87 senga sak a ni a, October 1, 2025-a thawh ṭan niin, thla 12 chhungin thawh zawh a ni.