Jordan Centre hawn a ni ta; 'Theihtawp kan chhuah dawn' - Synod Moderator

Mizoram Synod-in an enkawl tawh tur, Seṭhawna ruihhlo ngaite enkawlna hmun Jordan Centre chu October 6, Thawhlehnni khan Synod moderator Rev John Raldosanga'n Pathian hnenah hlanin, a hawng nghal a, theihtawp an chhuah dawn thu a sawi.

Synod Moderator chuan Jordan Centre pual hian Synod chuan ngaihtuahna a seng nasa hle tih sawiin, "Mizoram sorkarin chhanchhuah ngaite chhanchhuak tura Synod min ring zo hi kan lawm hle. Min rin ang ngeiin Pathian rinchhan chungin hlawhtling taka kalpui turin theihtawp kan chhuah dawn a ni," a ti.

Ngawlvei enkawlna piah lamah a enkawlzuina tur training buatsaih tum a nih thu sawiin Rev John Raldosanga chuan, "He hmun hi hlawhtling taka enkawl a nih theih nan a chhehvel kohhrante leh pastor bialte nena ṭan tlan a pawimawh hle dawn," a ti a, ṭawngṭai leh thilpek hmanga rawngbawl hna thawk zel turin kohhran mite a chah.

Synod Moderator chuan Jordan Centre hi Synod-in rescue home a enkawl pathumna a nih dawn tih sawiin, "Heng bakah hian Mizorama home hrang hrangte ṭanpuina atan cheng nuai 80 pek chhuah a ni tawh," a ti.

Khuallian Social Welfare minister Lalrinpuii pawhin thu sawiin, "Sorkarin a enkawl lai khan a theih ang angin enkawltu tur ṭha leh rintlak kan zawng ru a ni. Synod hotute pawh ka bekual," a ti a, mimal ang chuan he hmun hi Synod-in enkawl se a duh ber thu a sawi.

Lalrinpuii chuan sorkar ringawt chuan hetiang hi ṭha takin a enkawl thei lo tih sawiin, "Kohhranin hmangaihna nena a enkawl chi a ni. Synod hian rescue home ṭha tak tak an lo enkawl tawh ṭhin a, chuvangin hei pawh hi an hlawhtlingpui ngei ka beisei takzet a ni," a ti.

Social Welfare Minister chuan kum 15 chhung atan inremna siam ni mah se, a aia rei pawh kalpui zui zel a beisei thu leh sorkar pawhin a thlahthlam dawn loh thu a sawi.

Inkhawma tarlan a nih danin, Jordan Centre hi Mizoram sorkar leh Mizoram Synod inremna (MoU) angin March 18, 2026 aṭang khan kum 15 chhung Synod-in a enkawl turin tihfel a ni. He hmun enkawl tur hian Jordan Centre Managing Committee siam a ni a, chairman atan Rev Dr K Lallawmzuala leh director atan Rev Lalrinmawia ruat an ni.

Centre hi ṭhuang hnihin kalpui tur a ni a, ngawlvei enkawlnaah (De-addiction) hian mi 70-80 awm theiin, a dam mekte training pekna (after care) ah mi 150 vel awm theihna tur ruahman a ni. Chuvangin, addict centre mai ni loin thil zirna (training centre) a ni tel dawn.

A awm man hi thla khatah Rs 3,000 a ni ang a, pe thei lote chu Synod-in a tumsak dawn. Nimin aṭang khan admission hawn a nia, October 20-ah luh ṭan a ni ang.