Buhfai phur lirthei an tlân ngam lo

Mizoram Truck Driver Association chuan Kolasib leh Bairabi inkar kawng a chhiat lutuk avangin lirthei tlan ngamma khawpa kawng siam a nih hma chuan buhfai phurh tawh rih lo an rel a; nimin aṭang khan buhfai phurh an chawlhsan rih. Kawng chhiate chu rang leh chak taka siam a nih theih nan hma la turin sorkar an phût.

MTDA hmalakna hi Mizoram Tipper Association, Kolasib District chuan an thlawp a; kawng chu siam hun laia sorkarin a siam loh avangin tun dinhmun an thlen phah tih tarlangin, "Fûr an chhuanlama, thawm ṭhat a awm tak tak si lo. Vawiin leh nimin khan pick-up rit phur pahnih kawng chhiat vangin an tlu a ni," an ti a; buhfai phur tan phei chuan a hlauhawm lehzual tih an sawi.