MJA-in IPR director an thlah, an lawmpui

Mizoram Journalists' Association (MJA) General Headquarters chuan nimin khan Aizawl Press Club-ah Information and Public Relations director kalchhuak K Vanlalsangi thlahna leh director thar Mina Zoliani Joute lawmpuina hun an hmang.

IPR director thlahna leh lawmpuina inkhawm hi MJA vice president C Lalhmachhuana'n a kaihruai a; MJA president Vanlalrema Vantawl-in director kalchhuak K Vanlalsangi hnenah ngaihhruina thuchei hlanin, director thar Mina Zoliani Joute hnenah lawmpuina thuchei a hlan a ni.

MJA President chuan, IPR director kalchhuak K Vanlalsangi chu IPR department-a a thawh chhunga MJA-te duhsak taka thawhpui ṭhintu a nih thu sawiin, a chungah an lawm rualin, pension-a a chhuah a hun ve ta chu an ui thu a sawi a; a hma lam hunte hlim taka hmang turin duhsakna a hlan.

IPR Director thar lawmpuina thu sawiin Vanlalrema Vantawl chuan, a mawhphurhna ṭha taka hlen a, ram tan theihtawp a chhuah theih nan duhsakna a hlan a; MJA nen thawhhona ṭha an neih zel a beisei thu sawiin, Mizoramah journalism leh journalist ten hma an sawn zel theih nan theihtawp chhuahpui turin a ngen.

Director kalchhuak K Vanlalsangi chuan, IPR department-a a thawh chhunga MJA nen thawhhona ṭha tak an nei leh ram leh hnam tana an thawhna kawngah MJA member-te'n an finchhuah ṭhin chu lawmawm a tih thu a sawi a; thuthar lak khawm leh thehdarh kawngah theihtawp chhuah zel turin MJA member-te duhsakna a hlan.

IPR director thar Mina Zoliani chuan, MJA-in IPR director chhuakte an thlah ṭhin leh leh director tharte an lawmpui ṭhin chu hlu a tih thu a sawi a; IPR leh MJA-in tun hma aṭanga thawhhona ṭha tak an neih chu an chhawm nun zel a beisei thu leh, journalism-in hma a sawn zel theih nan theihtawp an chhuah dawn thu a sawi bawk.