Mizoram RTI Online 2.0 tlangzarh; RTI Online-ah zawhna 32,391 lut tawh

Chief information commissioner (CIC) John Neihlaia chuan nimin khan a pisaah Mizoram RTI Online 2.0 a tlangzarh. Mizoram RTI Online kaltlangin zawhna 32,391 a lut tawh.

Mizoram RTI Online 1.0 chu July 1, 2022 khan tlangzarh a ni a, nimin khan version 2.0 tlangzarh a ni. July 1, 2022 aṭanga nimin thleng khan Mizoram RTI Online kaltlangin RTI Act hmanga mipuiin sorkara hriat duh an neihte pe tura dilna 32,391 a lut tawh a ni.

John Neihlaia chuan, Mizo mipuiin RTI online an hman ṭhat thu a sawi a, "Mizoramah RTI hman sual an tih ang hi a awm lem lo a, state dangah chuan mimal an ngei zawngte tihbuai nante an hmang nasa. Mizoramah chuan chutiang chu a awm lem lo a, ṭha takin kan hmang a ni," a ti.

RTI Online version 2.0 chu a hma aia changtlung leh mipui tana hman awlsam a nih tawh dawn thu sawiin CIC chuan, "Kan tum ber chu mipui tana awlsamna thlen a ni. Version 2.0-ah hian RTI Act hmanga zawhna zawttuin chhanna a hmuh loh chuan computer hmangin appeal theih a nih dante hrilh nghal zung zung a ni tawh dawn," a ti a; mipui leh MIC tan thil tih a awlsam sawt dawn thu a sawi.

John Neihlaia chuan, Mizoram chu India rama RTI online kalpui thei pariatna a nih thu leh, harsatna awmte chingfel ṭha pawl nia a hriat thu a sawi a; khawl a nih avangin harsatna awm palh theih a nih thu sawiin, harsatna a awm chuan MIC hotute hnenah hriattir thuai ṭhin turin mipui a chah.

Tlangzarh inkhawm hi state informa-tion commissioner (SIC) Mangjangam Touthang-in a kaihruai a, SIC dang Dr Lalzirmawia Chhangte-in inlawmna thu a sawi. RTI Online siamtu Mizoram State e-Governance Society project director Isaac Zothanpuia'n RTI Online chungchanga hriat tur pawimawhte a sawifiah bawk.