MizoTaxi-ah lirthei 1,894 lut tawh; Mi 30,737-in application hmang tawh

MizoTaxi mobile application-ah Aizawla mihring phur sumdawnna lirthei - taxi, two wheeler taxi leh auto-rickshaw 1,894 ziah luh a ni tawh a, mi 30,737-in MizoTaxi app an hmang (down-load) tawh.

Transport department hotute hnen aṭanga Vanglaini thu dawn danin, MizoTaxi app-a inziah luh hun September 30, 2026 thleng khan pawhsei a ni a, hun hawn chhungin sumdawnna lirthei 324 ziah luh a ni. Aizawla tlan taxi, two wheeler taxi leh auto-rickshaw te chu MizoTaxi-ah inziak lut vek turin sorkar chuan hriattirin a ngen ṭhin.

Tun dinhmunah MizoTaxi-ah lirthei 1,894 ziah luh a ni tawh a, chu'ng zinga tam ber chu two wheeler taxi niin, 1,402 a ni. Four wheeler taxi 468 leh auto-rickshaw 34 an inziak lut tawh bawk. Nimin thleng khan MizoTaxi app hi mi 30,737-in an hmang tawh a ni.

Coordination Committee on Traffic Management-in a rêl angin Aizawl Traffic SP chuan September 11, 2026 khan hriattirna a tichhuak a; MizoTaxi-a inziak lutte chu December 14, 2026 thleng ni tin an tlân phal a ni a, MizoTaxi-a inziak lut lo lirthei dangte erawh chu intlân chhâwktir an ni thung. MizoTaxi-a inziak lutte chu taxi hma leh hnungah STA-in a pek MizoTaxi sticker târ ngei tura tih an ni.