Mautlangah zirtirtu an awm mumal loh vangin mipuiin lungawi lohna an lantir

Lunglei district-a Mautlang khaw mipui chuan Mautlang Upper Primary School (UPS) leh Lower Primary School (LPS)-ah zirtirtu an awm mumal loh avangin October 2, 2026 khan lungawi lohna an lantir.

Mautlang VC leh NGO tarlan danin, an khuaah hian sorkarin sikul pahnih UPS (middle school) leh LPS (primary school) a dah a, building ṭha tak a awm. Mahse, hun eng emaw chen kal ta aṭangin sikul an kal ṭha tawh lo a, khawtlang hruaitute'n zirtirtute chu sikul kal turin theihtawpin an nawr ṭhin.

Khawtlang hruaitute ngenna chu zirtirtute'n an ngai pawimawh ngai lo a, kum tirah admission tih hunah lângin (ni khat) an kal a, a bak chu hmuh tur an awm tawh ngai lo. Zirna avang hian mipui an buai a, an khaw ṭhenawm Zehtetah naupangte sikul kaltir a ngai ṭhin.

Mautlang khawtlang hruaitute chuan, sikul kal loa naupang an awm mai mai tur chu an lungawi thei lo tih an sawi a; hei vang hian khawtlang hruaitute bultumin zirlaite leh an nu leh pate chuan October 2, 2026 khan lungawi lohna an lantir a ni.

Mautlang UPS leh LPS zirtirtute chu ṭha taka an hna an thawh theih nan hma la tur leh, an khuaa awm thei tur zirtirtu ngaihtuahsak turin sorkar an phût a ni.