Faina atana thawk ṭhate chawimawi

Swachhata Hi Seva pualin nimin khan India ram pumah ‘Faina Ni' (Swachh Bharat Diwaz) hman a ni a; Mizoramah pawh kawng hrang hranga hman niin, faina atana thawk ṭhate hnenah chawimawina hlan a ni.

Faina Ni hi Aizawlah chuan UDPA auditorium-ah hman a ni a; khuallian PHE minister Prof. Lalnilawma chuan, "Faina chu rilru puthmang aṭanga inṭan leh mahni chauh inngaihtuah loa mi dangte hmakhua atana mahni inhlanna a ni. Mahni ṭheuh inenin, mahni ṭheuh aṭanga faina bul kan ṭan a pawimawh," a ti.

PHE Minister hian faina atana hma la ṭha leh thawk ṭha mi pasarih hnenah chawimawina a hlan a; Mizoramin faina kawnga chawimawi tur leh entawn tur mi ropui tak tak a nei chu ropui a tih thu a sawi. Faina lama thawkte (sanitation worker) mi 95 hnenah Ministrer hian personal protective equipment (PPE) a hlan bawk.

Aizawla Faina Ni puala inkhawm hi UDPA secretary V Lalsangliana'n a kaihruai a; khualzahawm H Lalremtluanga, Aizawl mayor pawhin thu a sawi bakah, Faina Hapta puala khawpui leh thingtlang lama hmalakna hrang hrangte ngaihthlaka enho a ni.

Swachhata Hi Seva hi kum 2017 aṭang khan India ram pumah hman a ni a, kum tin September 17 aṭanga October 2 chhung hman ṭhin a ni.