Swachhata Hi Seva Faina Hnatlangpui

Nimin khan Mizoram hmun hrang hrangah UDPA department leh PHE department huaihawtin Swachhata Hi Seva Faina Hnatlangpui neih a ni a, mi ṭhahnem tak an thawk chhuak. Hnatlangpui hi nimin zing khan MINECO pengṭhuamah PHE minister Prof. Lalnilawma'n a hawng.

Prof. Lalnilawma chuan, faina leh thianghlimna chu mihring nuna pawimawh tak a nih thu sawiin, "Ramin fainaa ramin hma a sawn zel theih nan sorkarin theihtawpin hma a la ṭhin," a ti a; bawlhhlawh aṭanga thil ṭangkai siam chhuah lehna (waste to wealth) leh solid waste management chu a pawimawh thu sawiin, "Mi eng emaw zatin eizawn nan an hmang a ni," a ti.

Faina Hnatlangpui hawnna inkhawm hi UDPA secretary V Lalsangliana'n a kaihruai a, inkhawm zawhah MINECO leh a chhehvel tihfai a ni.

Aizawl DC Pisapui pawhin zing dar 8 aṭangin Faina Hnatlangpui an huaihawt a, Hnatlangah hian department 28 aṭangin thawktu mi 500 vel telin, Lammual an tifai.

Hnatlang ṭan hmaa inkhawmah bawrhsap Lalhriatpuia chuan, faina tluantling neih turin rilru aṭanga fai a ngaih thu sawiin, "Intihluihna hmangin faina tluantling a neih theih loh. Mi tin hian faina hi tih dan phung, chìn ṭhana kan neih a ngai," a ti.

Khawzawlah pawh Swachhata Hi Seva Faina Hnatlangpui neih a ni a, sorkar pisa hrang hranga thawkte leh zirlaite bakah, Zaingen leh Darngawn veng mite an thawk chhuak a ni.

Chawlhkar hnih awh Swachhata Hi Seva campaign hi India ram pum huapa hman a ni a, September 17, 2026 khan ṭan niin, vawiin thleng awh tur a ni.