Sateek daia lirthei chesualah mi 3 thi; Thi zingah IIS officer pahnih an tel

Nimin chawhnu lam khan Sateek dai, Maubuang Damdiai nena inkarah Bolero a chesual a, mi pathum thiin, na takin pakhat a hliam. Thi zingah Doordarshan Kendra, Aizawl Director (News) leh Press Information Bureau (PIB) Regional Director (Imphal) te an tel.

Sateek YMA hruaitute hnen aṭanga thu dawn danin, lirthei chetsualna hun hriat a ni lo a, chetsualna lai hi khâm niin, a tlakna a sang hle. Nimin tlai dar 6 vel khan chhanchhuah hna thawktute'n lirthei chesual tlakna hmun an thleng a, nizan dar 8:30 vel khan hliam leh thite hi an la chhuak kim a ni

Lirthei chesuala thi zingah DDK, Aizawl director (News) Nampibou Marinmai, IIS, Manipur (Naga) leh, PIB leh Central Bureau of Communication (CBC) Regional Office, Imphal-a additional director general Dr Engam Pame, IIS te an tel a; pakhat dang chu CBC, Aizawla multi tasking staff H Lianvela, Chawlhhmun a ni. Lirthei khalhtu nia hriat hnam dang pakhat a hliam na viau bawk.

PIB hotute hian nimin khan Sialsuk an tlawh a, an haw lam an chesual a ni.