Students’ Science Seminar zawh a ni

State Council of Educational Research and Training (SCERT), Mizoram chuan nimin khan an auditorium-ah 45th State Level Students’ Science Seminar hmawrbâwkna an buatsaih a; School Education minister Dr Vanlalthlana'n hmanpuiin, Standardized Assessment for Elementary Schools (SAfES) portal a tlangzarh.

Seminar thupui chu ‘Indian Energy Basket 2047: Prospects and Challenges’ tih a ni. District pakua aiawh zirlai pakua intihsiakin, Serchhipa Marian High School zirlai TBC Vanlalzawmi pakhatna a ni a, national level seminar-ah Mizoram aiawhin a tel ang.

Dr Vanlalthlana chuan, zirlaite chu science hmanga thil nihna dik tak hriat châkna thinlung nei turin a fuih a, "Zirlai hlawhtling ni tur chuan rin thu mai maia thil sawi loin, thil nihna dik tak hai lang tura inchhiar zau peih a pawimawh. SCERT bultuma Students’ Science Seminar hian science zirna kawngah zirlaite hriat belh châkna a tihpun belh ngei ka beisei," a ti.

State Level Students’ Science Seminar-ah hian district pakua aṭanga district level Science Seminar-a pakhatna ṭheuhte an intihsiak a ni.

Standardized Assessment for Elementary Schools (SAfES) portal tlangzarhin Minister chuan, "Portal hi Mizorama zirlaite'n an zirnaah hmasawnna rualkhai an neih theihna tura hmanraw ṭangkai tak a ni dawn a, sikul hrang hranga zirlaite zirna dinhmun endikna portal him leh langtlang tak buatsaih a nih theihna tura SCERT-a thawktute thawhrimna a fakawm tak zet," a ti a; India rama Performance Grading Index-ah Mizoram tan hmasawnna a thlen ngei a beisei thu a sawi.

STUDENTS' SCIENCE SEMINAR

1-na TBC Vanlalzawmi, Marian H/S, Serchhip

2-na Thelma Z Nghoneiza, Maraland Academy, Siaha

3-na Rinchungnungi, GM H/S, Champhai