Cheng nuai 1,182.13 hù ruihhlo hâl

Excise & Narcotics department (END) chuan ruihhlo an man zinga court-in a chinfel tawh, Rs 11,82,13,173 (cheng nuai 1,182.13) hù chu nimin khan Bethani Multipurpose Farm, Phunchawngah an hâl.

Ruihhlo hâl hi NDPS Act, 1985 Section 51A leh NDPS (Seizure, Storage, Sampling and Disposal) Rules, 2022-in a sawi anga tih a ni a; nimina hâlte hi court-in a chinfel tawh thubuai 106-a ruihhlo mante niin, END commissioner Z Lalhmangaiha'n a dep kai a ni.

Z Lalhmangaiha chuan, ruihhlo an hâlte chu ruihhlo donaa an thawhpui Mizoram Police, Central YMA leh pawl hrang hrangte nena thawhhona ṭha tak an neih vang a nih thu a sawi a, "Ruihhlo hâl tur tlem tak nei ila, a theih phei chuan hâl tur neih loh hial a châkawm. Ruihhlo dona kawngah sorkar thâ tichak zel turin Mizoram mipui kan ngen a ni," a ti.

Ruihhlo hâlna inkhawm hi Drug Disposal Committee chairman Peter Zohmingthanga, END joint commissioner-in a kaihruai a; DDC secretary Mandy Lianchhingpuii, END deputy commissioner-in ruihhlo an hâl tâk chanchin tlangpui a sawi.