Aizawlah NE huap YI Parliament buatsaih

Education minister Dr Vanlalthlana chuan nimin khan Assembly Annexe conference hall-ah ram rorelna ziarâng zirlaite'n an hmelhriat theihna tura intihsiakna, 'Young Indians Parliament (YIP) NE Regional Round, Mizoram 2026' a hawng. YIP hi vawiinah chhunzawma zawh a ni ang.

YIP NE Regional Round-ah hian Mizoram aṭangin sikul panga - St Pauls HSS, Mount Carmel School, Neuhof English Medium School, Synod HSS leh St Stephen's School zirlaite an tel a; Assam leh Nagaland aṭangin zirlai 28 nen an vaiin zirlai 51 an tel a ni.

Dr Vanlalthlana chuan, hruaitu (leader)-te tan ṭawng thiam (communi-cation skill) a pawimawh thu sawiin, "Naupangte hi ram hruaitu leh hna pawimawh tak tak la chelh tur an nih avangin he platform hi an hma lam hun hriltu pawimawh tak a ni dawn," a ti a; Young Indians, Mizoram Chapter leh Confederation of Indian Industry (CII) ten intihsiakna an buatsaih chu lawmawm a tih thu sawiin, zirlaite chu theihtawp chhuah turin a fuih.

YIP NE Regional Round intihsiak chhung hian zirlaite chu rorel lai (ruling) leh eptu (opposition)-ah ṭhen an ni a, ram rorelna in sanga an tih ṭhin angin an bial (constituency) tana thil pawimawh chi hrang hrang sawihona te, zawhna leh chhanna hun te, bill draft leh sawihona hunte an hmang.

YIP regional round-a ti ṭhate tan award pariat siam a ni a; a ti ṭha zualte chu Delhi-a national level competition-ah an tel dawn a ni.