Bank of Baroda-in Police thi hnenah Life insurance Rs 10,00,000 an hlan
Home minister K Sapdanga chuan nimin khan a pisaah Mizoram Police leh Bank of Baroda thawh dunna kaltlangin June 16, 2026-a thi constable J Lalrinngheta, 1st MAP nupui Lalenkawli hnenah life insurance Rs 10,00,000 a hlan a; Mizorama sorkar leh bank thawhhona kaltlanga life insurance pek hmasak ber a ni.
K Sapdanga chuan, bank service-te chu a hmang thiam leh nachang hriate tan a ṭangkai thu sawiin, "Life insurance-te hi claim ngai lo ni se tih hi duhthusam a ni a, amaherawhchu, thihna hi kan dan rual a ni lo. Vanduaina thlenga hetianga lusûnte ûm zuina a awm hi thil hlu tak a ni a, kan Police hotute leh Bank of Baroda hotute remhriatna rah kan têl a ni," a ti a; life insurance leh healthcare chu hman a ṭul hun leh mamawh hun awm a nih avangin uar a ṭul thu a sawi.
Life insurance hi Home Minister hian J Lalrinngheta nupui Lalenkawli hnenah a hlan a; IGP (Hqrs) H Ramthlengliana leh 1st MAP commandant Rex Zarzoliana leh Bank of Baroda hotute an tel.
Bank of Baroda chief manager LR Thara Tlau chuan, Mizoram sorkar leh Bank of Baroda ten January 1, 2023 khan memorandum of understanding (MoU) an ziak a, MoU a tawp hnuah June 11, 2026 khan an ziah thar (renew) leh thu a sawi.
LR Thara Tlau chuan, MoU hmasaah personal accident insurance leh pensioner personal accident insurance atan inremna ziah a nih thu sawiin, "Tuna a tharah hi chuan life insurance kan ti tel a, Mizoram sorkar leh bank thawhhona hnuaia life insurance hmasa ber a niin kan hria," a ti. Bank of Baroda-ah Mizoram Police mi leh sa 1,000 velin account an hawn tawh thu a sawi bawk.
MoU kaltlanga hamṭhatna dawng tur hian Mizoram Police mi leh sate'n Bank of Baroda-ah salary account hawngin, chumi hmang chuan hlawh an lak a ngai a; chutihrualin, account hawng turin Police mi leh sate tihluihna a awm lo a, a duh apiang tan hawn theih a ni.
Bank of Baroda hian Aizawlah branch panga leh Lungleiah branch pakhat an nei a; Champhai, Serchhip, Kolasib leh Thenzawlah branch hawn belh tumin hma an la mek.