Zemabawk West leh Ramhlun SC-ah mi 223 hnenah land pass hlan a ni

Land Revenue & Settlement (LRS) minister B Lalchhanzova chuan nimin khan Ramhlun Sport Complex leh Zemabawk West (Risk Mual tih ṭhin) huam chhunga house site plan-a ram nei mi 223 hnenah ram neitu nihna Records of Rights (ROR) a hlan. Minister chuan, mipui ban phaka awm chu Revenue department-in an tum ber a nih thu a sawi.

Ramhlun Sport Complex Rehabilitation Centre House Site Plan huam chhunga chengte hnenah hian land pass (ROR) 127 sem a ni a; Zemabawk West House Site Plan chhunga ram neite hnenah ROR 96 sem a ni bawk.

Revenue Minister chuan, LRD department chu an insiam ṭha chho zel tih a sawi a, "Kan tum ber chu mipui ban phaka awm a ni a, chutiang tur chuan theihtawp kan chhuah a, min duhkhawp lohna tam tak a la awm ang a, mahse, kan ṭang tak zet. Kan lakah mi lo phun nasa mah se, insiamṭha chung zelin dawr nuam tak ni zel turin hma lam kan pan," a ti.

LRS department chuan mipui tan awlsamna siam turin kawng hrang hranga hma an lak thu sawiin Minister chuan, "e-RAM ah hian first come first serve kan ti a, minister hmelhriat neih leh neih lohin awmzia a nei tawh lo a, a dil hmasa sa a ni tawh. Revenue inrelbawlna bikah DC-te thuneihna sang tak kan pe a, sq.m 5,000 aia lian lo chinah DC-te hian ram pass tihfel theihna thuneihna an nei tawh," a ti a; minister leh thuneitu dangte hnena Aizawla rawn thlen kher a ngaih tawh loh thu a sawi.

B Lalchhanzova chuan, Aizawl bikah single window system an hman thu sawiin, "Tu officer dawhkanah nge file a kal muan a, a tàn rei tih hi computer hmangin Assistant Commissioner-te'n ni tin an endik vek thei tawh. File kal muang ṭhin chungchangah engtin nge Revenue department hi dawr nuam zawk kan nih theih ang tih hi kan ngaihtuah nasa hle ṭhin," a ti.

LRS department chu sual hmel ang takin an lang nia sawiin Lalchhanzova chuan, "A chhan chu min bum tum tam takin min rawn dawr ṭhin vang a ni a, lo dam thluam hi a harsa ve a ni. Min bum tum hi kan tawng hnem tawh em em a, a dik lo zawk ni reng siin dik zawk nih tumin thiam takin thil an rawn ti ṭhin. Tute emaw intihthiam loh kara lêng department kan ni a, kan fimkhur tak zet," a ti a; mipui tana dawr nuam ni turin an inzirtir nasat thu leh an kalphung pawh a dik chhoh viau tawh thu a sawi.

Ramhlun Sport Complex House Site Plan-a ROR semnaah hian bialtu minister Dr Vanlalthlana leh Zemabawk West-ah hian bialtu minister Lalthansanga te pawhin thu an sawi a; LRS director R Lalṭhazuala leh assistant director V Lalrindika ten report an pe bawk a ni.