ZPM-in ṭawiawm zel turin mipui an sáwm

ZPM party chuan nimin khan Vanapa Hall-ah General Assembly an hmang a; resolution siamin, ṭha taka rorelna an kalpui zel theih nan ṭawngṭaipui a, ṭawiawm zel turin Mizoram mipui an sáwm.

ZPM inkhawmpuiah hian president Lalduhoma leh president kalchhuak Lalliansawta ten thu an sawi a; ZPM Southern Headquarters leh district headquarters aiawhte'n an dinhmun an sawi bakah, point pathum awmna resolution an siam a ni.

ZPM GENERAL ASSEMBLY RESOLUTION

☑ Zoram mipuite'n Mizoram enkawl tura mawhphurhna min pek angin, ZPM chuan kum hnih leh thla riat lai rorelna kan lo chelh ve ta a. Zoram mipuiin min ṭawiawmnaah te, min ṭawngṭaipuinaah te, min fuihna leh zilhna zawng zawngah lawmthu kan sawi. Mizoram leh Zo fate tana ṭha ber kan duh a, chutianga rorelna kan kalpui zel theih nan min ṭawngṭaipui a, min ṭawiawm zel turin Zoram mipui kan sawm a che u.

☑ Party Executive Committee-in a rêl anga ZPM party hruaitu tur ṭha tak tak Val Upa Council-in min ruatsak hi kan lawm hle. Pu Lalduhoma kaihruaina hnuaiah chak taka ram hmasawnna kawng zawh zel turin theihtawp kan chhuah zel dawn a, kum 2028 inthlanpuiah pawh a hoin sorkar siam leh ngei kan inbeisei.

☑ ZPM auhla pui ber–thlai thar lei leh Bana Kaih policy te tluang taka kalpui a ni hi lawmawm kan ti a, chief minister Pu Lalduhoma leh a thawhpuite thawhrimna leh ṭhahnemngaihna zarah hlemhlêtna tawmimna state kan ni chho mek hi ropui kan ti. Mizoram ṭha zawk din tura thawhhopuiah Zoram mipui kan sawm a che u.