Mizo Territorial Army awmna tur endik

Sipai leh a kaihhnawih thila Chief Minister puitu Lt Col. Clement Lalhmingthanga, MLA chuan September 28, Thawhṭanni khan Mizo Territorial Army (TA)-te Aizawl district-a an awm lailâwkna tura tih Bung Bangla, a tlawh a; TA commanding officer Lt Col. Goldi Bora, PWD hotute leh Zemabawk khawtlang hruaitute'n an ṭawiawm.

Mizo TA batch hmasa bera lak Mizo ṭhalai 144-te chuan Gorkha Training Centre, Shillong-ah leh Corps of Military Police Training Centre, Bengaluru-ah training an nei mek a; training an zawh hunah district pathum - Aizawl, Lunglei leh Champhaiah te an awm dawn a ni.

Lt Col. Clement Lalhmingthanga hian Aizawl district-a Mizo TA zipaite awm lailawkna tur Bung Bangla chu TA training mekte'n training an zawh hmain awmna tlaka buatsaih a ṭul thu a sawi a, "He lai hmun hi officer panga vel leh sipai 50 vel awm theihna tura thawm ṭhat a ṭul," a ti.

Clement Lalhmingthanga chuan, TA-te chu inkhuahkhirhna khawng tak hnuaia enkawl tur an nih avangin mipui vantlang nena intlawhpawh loh a pawimawh thu leh, vantlang kawng ṭâwm lo a, a hmun panna tur kawng bik siam a ṭul thu a sawi bawk.

MLA hian TA awmna tur Bung Bangla hmun luhna leh chhuahnaa security post siam dan tur te, entry parking space ruahman dan tur te, in awm sa thawm ṭhat dan tur leh fuel storage facility bun dan tur te, camp panna tur kawng siam dan turte a en a ni.