Ruihhlo do beihpui thlakna tur tlangzarh; Ruihhlo laka fihlimah Tlangmawi puan a ni

Sorkarin kum thum chhung ruihhlo do beihpui thlakna tura a ruahman, 'State Action Plan to Combat Drug Menace 2026-2029' chu September 28, Thawhṭanni tlai khan Governor Gen. Vijay Kumar Singh-a'n Assembly Annexe Conference Hall-ah a tlangzarh. He hunah hian Home minister K Sapdanga'n Khawzawl district-a Tlangmawi chu Mizorama ruihhlo laka fihlim hmasa ber khuaah a puang.

Governor chuan, sorkarin ṭanrualna hmanga ruihhlo do a ngaih pawimawh thu sawiin, "Prime Minister-in chawlhkar 100 awh tur ruihhlo do beihpui thlakna, 'Nasha Mukh Bharat Sankalp Abhiyan' chu August 2, 2026 khan a tlangzarh a, India ram hi December 31, 2029-ah chuan ruihhlo hmanga sumdawnna awm lohnaa siam tum a ni," a ti.

Ruihhlo do dan tur ruahmanna tlangzarh tak chu khawtlang ṭanrualna leh inzirtirna behchhana ṭhalaite ruihhlo laka chhanchhuahna tur a nih thu sawiin Larsap chuan, "Tun hi a bul ṭanna a ni a, kum thum hnuah a rah chhuah kan hre thei dawn a ni," a ti a; ruihhlo do beihpui thlak a hlawhtlin theih nan mi tin lungrual taka an thawhho a ṭul thu a sawi.

Gen. VK Singh chuan, ruihhlo do beihpui thlaknaa hmalak dan tur tlangzarh tâk chu YMA kumpuan 'Ruihhlo do' nena inmil tak a nih thu a sawi a, "Mizoram hi ramri thui tak nei a ni a, India ram pum tana kawngkapui vengtu leh mawhphurhna sang tak nei kan nih avangin kan inthlahdah thiang lo a, beng chhi renga kan awm a ṭul. Ruihhlo tawlh vanga hlâwk thut duhna kan hnualsuat a ngai," a ti.

Governor chuan, Mizoram sorkar hmalakna - ramri kaltlanga ruihhlo tawlh vên beihpui thlakna Operation Jericho leh ruihhlo ngaite enkawlna Hulhliap Short Stay Centre hmalaknate fakawm a tih thu sawiin, "Ruihhloin Mizo ṭhalai hna thawk rual, a bikin mipa nunna nasa taka a suat hi a veiawm," a ti a; district leh state level-ah Nasha Mukh Bharat Abhiyan leh Narco Coordination Centre te chu theihtawp chhuah turin a chah.

Home minister K Sapdanga chuan, an hun hman chu ruihhlo laka Mizoram humhim tura thutlukna puan chhuahna, ram leh hnam humhimna atana intiam tharna a nih thu a sawi a, State Action Plan chu tihhlawhtlin a nih theih nan mawhphurhna hrang hrang neite tun atanga theihtawp chhuah turin a chah.

K Sapdanga chuan, ruihhlo laka fihlim khua ni tura Tlangmawi khaw mipui ṭanrualna leh huaisenna fakawm a tih thu sawiin, "Ram pum tan thuchah ropui tak, ruihhlo laka zalenna an puang a, mi dang tan chona thianghlim tak an rawn chhawp chhuak a ni," a ti.

State Action Plan to Combat Drug Menace 2026-2029 tlangzarhnaah hian Social Welfare minister Lalrinpuii, sorkar official, khawtlang leh pawl hruaitu te, kohhran hruaitute leh zirlai eng emaw zat an tel a ni.