Ruihhlo laka ven ngai kan ngah - HM

Home minister K Sapdanga chuan, Mizoram chu ruihhlo kalkhân remchang a ni a, ruihhlo lakah a him loh thu leh ven ngai a tam thu leh, an tum ber chu ruihhlo tawlhrukna leh sumdawnnaa inhnamhnawih zawng zawng man chhuah a, tihchhiat vek a nih thu a sawi.

K Sapdanga hian nimin khan ruihhlo dona tura sorkar ruahmanna, 'State Action Plan to Combat Drug Menace (2026-2029)' tlangzarh inkhawm Assembly Annexe conference hall-a buatsaihah thu sawiin, "Kan chhak lawkah triangle anchhedawng a awm a, keini hi sorkar hrang daih karcheh chhungah kan awm a, ruihhlo kalkhân remchang kan ni," a ti.

Home Minister chuan, Mizoram ṭhenawm state-te chu ruihhlo venpuitu ni loin, râwlrûktu an nih zawk thu sawiin, "Hengte avang hian ruihhlo lakah kan him lo a, ven ngai kan ngah em em. Kan ram paltlangin ruihhlo an tawlh ru a ni satliah lo," a ti a, ruihhlo fûn khat lek pawh an thlauhin chhungkua pakhat talin an chhiat phah hman zel thu a sawi.

K Sapdanga chuan, "Kan tum ber chu ruihhlo tawlh rûk man chauh ni loin, tawlh ruk dan ruahmantu te, pawisa thawhtute leh he sumdawnnaa an zâwlpui zawng zawng hai lan a, man chhuah a, tihchhiat vek a ni," a ti.

Ruihhlo vanga ṭhalai pakhat nunna an chàn apiangin Mizoram hma lam hun an chán tel tih sawiin Sapdanga chuan, "Ruihhloin chhungkua a luhchilh tawh chuan chhungkaw pum rilru natna a thlen a, harsatna nasa tak a thlen ṭhin," a ti a; ruihhloin Mizoram a chîm hneh tawh dan chu Police, Excise leh tlawmngai pawlte ṭangkawpin an hahpui tawhzia aṭangin a lang chiang tih a tarlang.

Home Minister chuan, an hna chu ruihhlo leh a zuartute manah a tàwp mai theih loh thu sawiin, "Ruihhlo tawlhtu pakhat kan man apiangin a chhehvela a zawmpuite kan chhut chah nghal zel a ngai ṭhin," a ti a; ruihhlo man rualin ruihhlo bâwiha tâng mekte chhanchhuahna, siamṭhatna leh khawtlanga an kîr lehna tur kawng siamsak a ngaih thu a sawi.

K Sapdanga chuan, Mizoram Police leh Excise & Narcotics department tihchak mek mek a nih thu sawiin, "Thawktute lak belhin, hmanrua ṭha zawka thuam belh zel a ni. Anti-Narcotics Task Force din a ni a, State Narco-Coordination Centre - NCORD mechanism pawh tihchak a ni. Hei hian ruihhlo ûm kawngah thawhhona ṭha zawk a thlen dawn a ni," a ti.