ZPM sawiselna ringawt zawng loa party policy buaipui turin chah

ZPM senior vice president Dr Kenneth Chawngliana chuan, MNF leh Congress party chu ZPM sorkar sawiselna tur ngaihtuah loa an mahni party policy buaipui turin a chah a; NDA an zawm dawn leh dawn loh chungchangah mipui sorkar an nih angin mipui aṭanga nawrna a zir a nih dawn thu a sawi. VUC member bangtate chu CM an puhna a dik leh dik loh court-ah fiah turin a chah.

Dr Kenneth Chawngliana chuan, tun hnaiah eptu party-ten anmahni inchingfel hmasa si loin ZPM party chhung inrelbawlna leh a bik takin Chief Minister beihna nasa takin an kalpui mek tih a sawi a, "Chief Minister kaihhruaina hnuaia ZPM sorkarin Zoram hmasawnna tura kawng hrang hranga a hmalakna hlawhtling chho zel hi Zoram mipuiin an hlutsak em em lai a, hetianga insawiselna lam ringawt policy number 1-a an nei ta mai nia lang hi pawi kan ti takzet. Kum 2028 kumtawp lama inthlanna tur an urlawk a nih pawhin, ruling party ni mek ZPM sorkar sawiselna ngawr ngawr ngaihtuah loin, inthlanpui lo awm tura an party-in policy-a an neih tur duang meka an insawite hi buaipui hmasakah nei zawk se," a ti.

MNF leh Congress party-te policy ni meka mipuiin an hriat chu ZPM sorkara Chief Minister beihna ringawt ni bera a lan thu sawiin Dr Kenneth Chawngliana chuan, "Hetiang zâwnga politics kalphung hlui chawinun leh hi an policy ni ta berin a lang. An party chhung chingfel tura ZPM party kan inrawlh lo ang bawkin, ZPM party inrelbawlnaa thu dik lo leh dawt phuahchawp hmanga Zoram mipui thlêkpui an tum mek hi sim vat turin kan ngen a, mipui duh dan pawh niin a lang," a ti a; thu belhchian dawl lo leh dawt hmanga party pahnihten ZPM an beihna hian ZPM party-ah lungrualna leh ṭanrualna a siam zel zawk niin a sawi.

ZPM Senior Vice President chuan, "Zoram hmun hrang hranga ZPM party mi leh sate hetiang puh mawhna dik lo leh thu belhchian dawl loahte hian lo chi-ai lo tur leh social media-a ṭawngkam uchuak leh midang tana ngaihthlak nuam lo lakah fihlim turin ka ngen a ni," a ti.

NDA zawm leh zawm loh chungchang zawhna chhangin Dr Kenneth Chawngliana chuan, "Mimal level-a ṭhiana siam bak hi chu kan la kal lo reng reng a, zawm tur pawh hian min sawm chamchi a, party angin sawihona pawh kan la nei lo. Mipuiin min nawr zawk a nih chuan mipui sorkar kan nih tlat avangin i han enchhin ang u hmiang kan la tih hunte pawh a awm mahna," a ti a; tunah chuan zawm tumna an neih loh thu leh zawm tum anga sawinate chu thu dik lo a nih thu a sawi.

Dr Kenneth Chawng­liana chuan, VUC member pahnihten VUC Chairman hnena banna lehkha an thehluhah eiru leh mipat hmeichhiatnaa inhnamhnawih anga Chief Minister an tarlan chungchang sawiin, "Keini party ber pawhin kan la hre lo a, a dik leh dik loh hi a puhtute hian court-ah fiah rawh se. Puhna dik lo tak 'hetah hian, hemi ni hian, heti zat hi' tih pawh sawi a awm lo, hengte hi rawn ti chiang law law se la," a ti a; VUC rorel dana lungawi loh vanga bang nia an lan thu leh VUC member pahnihte hi mimal duhsak bik neihna lamah an kal na zawk nia a lan thu a sawi bawk.