VB-GRAMG-ah hna chi 375 a awm

Rural Development & Administrative (RDA) minister Prof. Lalnilawma hoin nimin khan Irrigation conference hall-ah VB-GRAMG leh sorkar laipui scheme dangte thlun zawm a, department-te inkara thawhhona ṭha zawk a awm theih dan tur sawihona buatsaih a ni. VB-GRAMG hnuaiah hna thawh theih (permissible work) chi 375 a awm tih an tarlang.

RDA Minister chuan, VB-GRAMG hnuaiah thil dang nena kaihkawp (convergence) ngaih pawimawh a nih thu a sawi a, "RDA department hi department hrang hrangte thawhpui turin kan inhawng reng," a ti a; October 2026 aṭanga Viksit Gram Panchayat Plan siam turah ruahmanna leh rawtna te thlen turin department hrang hrang hotute a chah.

Thingtlang aṭanga ruahmanna fel tak siam a pawimawh thu sawiin Prof. Lalnilawma chuan, "Aizawl chauh kan tihhmasawn a, thingtlang khuate kan hlamchhiah chuan Viksit Bharat kan thleng thei dawn lo. A pawimawh ber chu thawhhona ṭha neih leh thawktute inpekna a ni," a ti a; hmasawnna hna thawhte leh sum hmannate a inmil em tih official-te'n an inzawh fo a ṭul thu a sawi.

Convergence work-shop-ah hian RDA deputy secretary Lalvenhima’n VB-GRAMG hnuaia thawh theihte a sawifiah a, additional secretary V Lalengmawia’n scheme dangte nena thlun zawm theih dan a sawi a; sawihona hun hman a ni bawk.