MNF ṭhalaite'n Home Minister dah hniam tumah Chief Minister an puh
Mizo National Youth Front (MNYF) chuan chief minister Lalduhoma chu Home minister K Sapdanga hnuaichhiah leh dah hniam tumah an puh a; K Sapdanga kut phuarsakin, Home department chhuhsak a tum em tih CM Lalduhoma an zawt.
Nimin khan MNYF general secretary-te'n Aizawl Press Club-ah thuthar thehdarhtute an kâwm a; Eva Lalduhawmi Tochhawng chuan, "Super CM Pu Lalduhoma hian Home minister Pu K Sapdanga hi hna thawk thei lo leh kut phuarsakin a siam ta mai em ni? Home Minister ngawih reng nachhan hi Super CM hian a department chan pahnih a chhuhsak tawh a, a ṭum thumna atan a department chan Home thleng hian chhuhsak a tum leh ta em ni tih hi kan zâwt a ni," a ti.
Eva Lalduhawmi chuan, ram hruaitute chu lozawh leh hlimhlawp bâwla huau huau ringawt buaipuiah puhin, "Dan leh thupek kenkawh kawngah nasa taka ṭan la tur leh, tih tak takna nen Mizoram tan ke pêna hna thawk lehzual turin kan phût," a ti a; tun hnaiah Mizoram hmun hrang hrangah ruihhlo a zalên a, tualthahna, rûkrûk leh tharum thawhna a thleng zing hle tih a sawi.
MNYF GS chuan, "Zoram mipui thlamuan tura Home Minister thu leh hla hriat tur a awm loh laiin Super CM erawh Home Minister hmakhalh leh lâr khalh tum ni âwm hrimin a thu leh hla hmuh tur a tam hle," a ti a; Home Minister chu a department chanah thuneihna a la nei a nih chuan ram mipui thlamuanna tur thuchah nei turin a phût.
Assembly House-ah Chief Minister-in Mizoram Police chungchang mawi lo takin a sawi tih sawiin Lalduhawmi chuan, "Police-te phûrna a tihniam nasa hleah kan ngai. Khatianga Mizoram rorelna sang bera thu a chhâk chhuak duh mai kha a makin, kan police-te hotu lu ber Home Minister chu mahni hna pawh tlin lo leh minister chak lo tak anga tlâng hriata lantir a duh vang zawk a ni em tih hi kan zawt a ni," a ti.
Eva Lalduhawmi chuan, tun hnaiah ZPM hruaitu ruat thar a nih thu sawiin, "ZPM dintute zinga nasa taka hma latu leh party tana thawh hlawk ber Pu K Sapdanga chu chanvo nei miah loa dah nìl a ni a, Super CM-in a department chan pahnih lai a chhuhsak mai bâkah, ṭawngkam mei nei leh hnuaichhiah taka an party chhung inkhawma a ûm zui danah hian Super CM leh Home Minister inkârah hian thawhho hleih theih lohna leh khi thûk tak a awm tih a lang chiang hle," a ti bawk.
MNYF TARLAN ṬHENKHAT
☑ Democracy ramah chuan sorkar hi mipui siam, mipui ta leh mipui tan a nih ang ngeiin kan aiawh tur leh, mipui tan Home Minister hian a hunah pa chan changin, a tih turte amah ngeiin ti ṭhin tawh se.
☑ Congress sorkar laia sorkar leh HPC(D) inrem ṭum khan CM Pu Lal Thanhawla chuan khatihlaia Home minister Pu R Lalzirliana chu lo dawngsawng turin a ti a; kumina HPC(D-LF) leh sorkar inremnaah chuan Super CM berin Home Minister hmakhalhin, changtupa chan a chang daih.
☑ 2025 khan Mizoramah tualthahna vawi 11 a thleng a, kumin ringawtah tualthahna a thleng zing ta hle. Hei hian ZPM sorkar chu law & order/enforcement kenkawhah a hlawhchham tih a tarlang.
☑ Zakaria Lalhriattluanga chhungte hnenah sorkar hian zangnadawmna pe rawh se.