VUC member 2-in bânna an thehlut; Chief Minister chêt danah an lâwm lo

ZPM Val Upa Council (VUC) member pahnih - Bualhranga, ex-MLA leh Rin Sanga, IAS (Rtd) te chuan VUC chairman Lalfakzuala hnenah September 21, 2026 khan VUC aṭanga bânna an thehlut. Bânna an thehluh chhan chu chief minister Lalduhoma chêt danah an lawm loh vang niin an sawi.

Bualhranga hi VUC bulṭhut (concept) siamtu a ni a, Rin Sanga hi Zoram Reformation Movement (ZRM) aiawha VUC member atana ruat a ni. VUC din a nih tirh, kum 2017 aṭanga tel ve ve an ni a; ZPM office bearer tura VUC ṭhutkhawm hnuhnung ber thlengin an tel. September 21, 2026 khan VUC chairman Lalfakzuala chu a inah kal chilhin, a rualin bânna an thehlut a ni. VUC Chairman hian a pawm dawn leh dawn loh hriat a la ni lo.

Bualhranga hian bânna a thehluhah, VUC bul ṭantu Lianchia (L), Dr Thangdailova (L) leh F Lalremsiama te awm lai chuan ram tana ṭha tur an sawiho a, an thu-ah an din ngheh ṭhin thu a sawi a, "Engkimah a chhan leh vàng kan sawiho a, thinlung takin kan inthurual a, beng sen khawpa inhnial chángte awm mah se, a tawpah chuan kan inthurual leh ṭhin. Tunah chuan chu chu a theih tawh loh a, groupism chhe-miin min tlâkbuak ta a ni," a ti.

VUC ṭobul hre tan leh VUC article, section, clause duang vektu K Sapdanga hmaizah vang pawhin VUC-ah a tel zui thei tawh lo tih sawiin Bualhranga chuan, "Kan thusawi leh sûkthlêk ka en hian ram leh hnam aiin mahni kan dah hmasa ziah tih chiang takin ka hmu. Pastor pension tawh te, kohhran hruaitu dangte kan ni fur a, mahse, hei hi kan khawsa zia chu a ni si," a ti a; ZPM Ministry chu insawimawi leh sawi mâm ringawt thiam, ho khawm leh thawh mâm thiam si loin a ho niin a sawi.

Bualhranga chuan, eptu party an nih laia an MLA leh VUC an inkawm ṭumin, tuna an hotu ber ni tain, 'System ṭha tak kan ruahman ang a, chu chu mipui hnenah kan zuar anga , inthlan lehah chuan kan tling tawh ang,' tiin a sawi tih a tarlang a, "Entawn tura kan nunin a tlin leh si loh chuan system ṭha chu engmah a ni lo tih hi a chiang em em. Tunah hian hmeichhiat mipat thu-ah sawisep a awm a, chutiang bawkin corruption-ah pawh a awm. Mizo upain 'Pán loah chuan tho a fu ngai lo e' an tih ang kha a dik viau a ni," a ti.

Lal hrawtna, dictatorship leh political thuneihna lama ruihna a thlen ngei dawn nia sawiin Bualhranga chuan, "ZPM hi ka thinlungah ka dah sang hle a, ka theihtawpin sum leh paiah te pawh ka ṭang ṭhin. Political development ka thlirna aṭang chuan sovereign state kan hloh a, ziaawm deuh turah ngai ila. Hitler-a dictator-a a inhlàn dan leh kan rama tuna kan hotupa kalhmang hi a khaikhin theihin ka hria," a ti a; VUC chu ngaihtuahzui ve turin a ngen.

Thuthar thehdarhtute zawhna chhangin Bualhranga chuan, minister hoin a beisei ang an pha a, mahse, Chief Minister berin a beisei a phâk loh thu a sawi.

BUALHRANGA TARLAN TLANGPUI

☑ VUC bul ṭantu Lianchia (L), Dr Thangdailova (L) leh F Lalremsiam te an awm lai chuan ram tana ṭha tur kan sawiho a, kan thu-ah kan ding nghet.

☑ Kan thusawi leh sûkthlêk ka en hian, ram leh hnam aiin mahni kan dah hmasa ziah tih chiang takin ka hmu.

☑ Tunah hian mipat hmeichhiat thu-ah sawisep a awm a, corruption-ah pawh a awm. Mizo upain 'Pân loah chuan tho a fu ngai lo e' an tih ang kha a dik viau.

☑ ZPM hi ka thinlungah ka dah sang hle a, ka theihtawpin sum leh paiah pawh ka ṭang ṭhin.

☑ Hitler-a dictator-a a inhlàn dan leh kan rama tuna kan hotupa kalhmang hi a khaikhin theihin ka hria.