Dinhmun sang zawka sikul hlankai lawm

Kawnpui Joint Village Council chuan nimin khan Kawnpui Chhimveng YMA Hall-ah an khaw sikul pathum dinhmun sang zawka hlankai an nih an lawm a, School Education minister Dr Vanlalthlana'n a hmanpui.

Kawnpui Higher Secondary School leh Green Hill High School chu tun hnaiah sorkarin sorkar sikulah a dah (provincialise) a, Lalfak Memorial High School chu Lumpsum Special Category S2-ah a dah bawk.

Dr Vanlalthlana chuan, sikulte chawisan a ni chu khawtlangin theihtawp an chhuah vang a nih thu sawiin, "Zirtirtute pawh khawtlang zai ngai thiamin, khawtlang tan theihtawp chhuah zel u la, adhoc aṭanga provincialise in nihnaah duhtâwk mai loin, result ṭha zawk nei turin ṭan la thar leh zel rawh u," a ti a; Pathian rinchhana nu leh pa, ṭhiante leh zirtirtute ráwn tam tur leh kawng dik zawh zel turin zirlaite a chah.

Khualzahawm bialtu MLA K Laldawngliana leh South Tuipui bialtu MLA Jeje Lalpekhlua te pawhin thu an sawi a; K Laldawngliana'n sikul pathum hnenah lawmpuina Rs 25,000 ṭheuh leh football a hlan.

Sikul pathum hnenah hian Lok Sabha MP Richard Vanlalhmangaiha'n lawmpuina atan Rs 2,50,000 ṭheuh a MP fund aṭangin a pe tih tarlan a ni bawk.