Aizawlah Ayurveda Day hman a ni

Nimin khan Central YMA Hall-ah Ayurveda Day vawi 11-na hman a ni a, Health & Family Welfare minister Lalrinpuii'n a hmanpui. Day thupui chu 'Ayurveda for a healthier tomorrow' tih a ni a, Ayurvedic Pharmacovigilance Awareness hun hman nghal a ni.

Health Minister chuan, nunphung inthlak danglam vangin zunthlum, thisen sang, cancer leh lung (heart) lam natna a hluar tial tial thu a sawi a, "Heng natna dona kawngah ayurveda thu ken, 'Natna laka inven hmasakna - taksa, rilru leh leilung inrem taka nunho theih' tih hi a chhanna pawimawh tak a ni," a ti.

Sorkar laipui leh Mizoram sorkar ten mipui hriselna chawi kân an ngaih pawimawh thu sawiin Minister chuan, "National Ayush Mission kaltlangin Mizoramah Ayush Health and Wellness Centre-te dinin hmalak zel a ni a, mi tin ban phaka Ayush doctor an awm ta hi hriselna kawnga kan ram hmasawnna a ni," a ti a; hriselna lama inenkawlnaah modern medicine chauh rinchhan loin, ayurveda leh AYUSH te chu chawi kân zel an tum thu a sawi.

Lalrinpuii chuan, Ayurveda damdawi khuahkhirh leh dik taka hmanna (ayurvedic pharmacovigilance) chu a pawimawh hle tih sawiin, "Ayurveda damdawi kan hmanin a dik, a him, leh a ṭha ber chauh mipui hnen a thlen theih nan kan Ayush doctor leh health worker-te hian mawhphurhna lian tak an nei a, mipui rintlaka kalpui zel a ṭul a ni," a ti.