KMMTTP-a zangnadawmna la fel lote chingfel thuai turin sorkar laipui ngen

Chief minister Lalduhoma kaihhruaiin nimin khan Mizoram Pro-Active Governance and Timely Implementing (Mi-PRAGATI) an ṭhu a; Kaladan Multi-Modal Transit Transport Project (KMMTTP) kaihhnawiha zangnadawmna la chinfel lohte chingfel thuai turin sorkar laipui hotute an ngen.

Ṭhutkhawmah hian Mizorama KMMTTP kawng siam tawh zinga tuna chhe leh tawhte chu a rang lama siam turin Ministry of Road Transport & Highways aiawhte hriattir an ni a, zangnadawmna la chinfel lohte pawh chingfel thuai tura ngen an ni.

Ministry of External Affairs hnuaia thawh Myanmar ram chhunga kawng Paletwa – Kaletwa – Zochachhuah inkar siam mekah Paletwa - Zorinpui inkar km 109.2-a thui chu hna 23.35% zawh a nih tawh thu tarlan a ni.

Sairang aṭanga Hmawngbuchhuah thlenga rêl kawng siam chungchanga Railways-in hma an lak tawh dan leh, Sairang chawlhhmun tihchangtlunna hna thawh mek dan thlirho a ni a; Railways hmalakna chungchang chu hun dangah CM hoa sawiho leh turin an dah.

Indo-Bangladesh ramri hung leh kawng siam (Border Fencing cum Road Rajiv Nagar Segment) chungchanga hmalak tawh chin Ministry of Home Affairs aiawhte'n an sawifiah a; kawng chhe tawh lutuk chu a rang lama siamṭhat a ṭul thu an tarlang.

Cyber crime leh digital arrest chungchanga Mizoram State Cyber Crime Coordination Centre hmalakna leh hnathawh te, Aizawl - Tuipang National Highway hnathawhin a nghawng zinga la chinfel loh ṭhenkhatte pawh sawiho a ni.

Mi-PRAGATI ṭhutkhawmah hian Public Works minister Vanlalhlana, Environment, Forest and Climate Change minister Lalthansanga, Agriculture & Farmers Welfare minister PC Vanlalruata leh sorkar mi pawimawhte an tel a; online kaltlangin Delhi leh Mizoram hmun hrang hrang aṭangin sorkar hotute an tel bawk.