KHAWTHLIR

Finance Commission

Mizoram Finance Commission pathumna atana chairman Lalnuntluangi Tochhawng, ICAS (Rtd) leh member Vanlalnghaka, MFAS (Rtd)-te chuan nimin khan an hna an zawm a; Mizoram State Finance Commission pisa tur chu Chief Controller of Accounts Office, MINECO-ah siam a ni. Lalnuntluangi Tochhawng hi Indian Civil Accounts Service 1984 batch a ni a, Vanlalnghaka hi Mizoram Finance and Account Service 1982 batch a ni.

Smart VC app

Lunglei additional DC Zoramdini chuan nimin khan Lunglei district-a village council-te hman tura duan Smart VC mobile application a tlangzarh. Smart VC app hi Bána Kaih Scheme hnuaia Mizoram District Transformation Programme kaltlanga Lunglei District Catalytic Intervention Plan aṭanga siam a ni.

NHRC hotuin tlawh

National Human Rights Commission (NHRC) special rapporteur Sayeed Ahmed Baba chuan nimin khan Champhai district-a sorkar office, home/centre leh hmun pawimawh hrang hrang a tlawh. NHRC hotu hian hmunhma a tlawha thawktute a kâwm a, an hnathawh leh harsatna an tawhte ngun leh hma an sawn zel dan turte a sawipui a ni.

Project Genesis

Lunglei SDC Satish Kumar chuan nimin khan Lunglei district-a kalpui turin nuin damdawi-in/health centre-a nau a neih ngei theihna tur leh first trimester ANC registration hmasawnna tura beihpui thlakna 'Project Genesis' a hawng. Project Genesis hi Lunglei district-a khaw 13-ah kalpui tum a ni a, nau pai (target) 166 an awm a ni.

Serchhip lei enfiah

Serchhip additional DC Dorothy Muansangi kaihhruai Joint Inspection team chuan September 22, Thawhlehni khan Serchhip Bypass Road-a lei (bridge) an tlawh a, lei dinhmun leh enkawl zel dan tur an enfiah. Lei enfiahnaah hian Mizoram University-a geotechnical expert Prof. Laldinpuia, PWD Serchhip Division aiawh, NHIDCL Manager leh engineer-te bakah contractor-te an tel a ni.

Video siam zirna

SCERT leh NCERT ten September 21, 2026 aṭanga ‘Workshop for Development of Quality Video Content under PM e-Vidya DTH TV Channels’ an buatsaih chu nimin khan khar a ni. Zirhonaah hian Aizawl district-a sikul hrang hrang aṭangin zirtirtu 20 an tel.

IR Kohhran jubilee

1st IR commandant MS Dawngkima chuan nimin khan 1st IR Kohhran Hall, Mualvumin kum 30 a tlin puala buatsaih ‘Pearl Jubilee Souvenir’ a tlangzarh. MS Dawngkima chuan, 1st IR Kohhranin police-te nunah awmze thûk tak a neih thu a sawi a, "Police mi leh sate'n thlarau nun lamah nasa takin hma an sawn phah a, inthununna lamah a ṭha zawngin hmasawnna a thlen nasa hle a ni," a ti.

KMMTTP sawiho

Study Team on Socio Cultural & Economic Impact of KMMTTP & Railway Line chuan nimin khan chief minister Lalduhoma kaihhruaiin CMO conference hall-ah Study Team report aṭanga thil hmanhmawhthlak zual bawhzui dan tur an sawiho. Department hrang hrangte bawhzui tur an siam a, thla khat hnua thlirho leh atan an dah.