Audit team-in biak-in an endik

Ministry of Social Justice and Empowerment hnuaia Department of Empowerment of Persons with Disabilities (DEPwD)-in ram pum huap Accessible India Campaign a kalpui meka Audit team chuan nimin khan Aizawla biak-in ṭhenkhatah rualbanlote tan kal awlsamna siam a nih leh nih loh an endik.

Audit team hian Ramhlun North-a Presbyterian Kohhran leh Baptist Church of Mizoram biak-in te, Durtlanga St. Francis of Assisi Church biak-in, Leitan leh Durtlang Presbyterian Kohhran biak inte leh, Salvation Army Durtlang Corps biak-inte an endik a; Mizoram Persons with Disabilities commissioner Vanlaldiki Sailo bakah AMC, PWD leh IPR department aiawhte'n an ṭawiawm.

The Rights of Persons with Disabilities Act, 2016 chuan rualbanlote hamṭhatna atan Access Audit (Accessible India Campaign/Sugamya Bharat Abhiyan) a duang a; puipunna hmun - biak-in, zirna-in, pisa, damdawi-in, vantlang veivahna lirthei leh hnathawhna hmunte chu mi chi tin tana chet vel awlsamna siam tur zingah a tel a ni.